ފަތުރުވެރި ކަމަށް ގެއްލުމެއް ލިބިދާނެ ކަމެއް ސިޔާސީ ޕާޓީއަކުން ނުހިންގާނެ: ޕީއެންސީ

ރާއްޖޭގެ ފަތުރުވެރި ކަމަށް ގެއްލުމެއް ލިބިދާނެ ފަދަ ކަމެއް ރެޖިސްޓްރީ ކޮށްގެން ހިންގައި ސިޔާސީ ޕާޓީއަކުން ކުރާނެ ކަމަށް ގަބޫލު ނުކުރާ ކަމަށް ޕީއެންސީން މިއަދު ބުނެފި އެވެ.

ޕީއެންސީން މިހެން ބުނެފައި މިވަނީ ކޮންގްރެސް ހައުސް، ހ. ވެޔޮވިލާ، ގައި ރޭ ބޭއްވި ހަރުގެ ޖަލްސާގައި ރާއްޖެއަށް އަންނަ ބުރާސްފަތި ދުވަހުގެ ނިޔަލަށް ދެ މިލިއަން ފަތުރުވެރީން ޒިޔާރަތް ކުރާތީ، އެކަމަށް ހުރަސް އެޅުމުގެ ގޮތުން އިދިކޮޅު އެމްޑީން ޓެރަރިސްޓް ހަމަލާއެއް ދޭން އުޅޭ ކަމަށް ބުނެ ދެއްކެވި ވާހަކަތަކާ ގުޅުވައިގެންނެވެ.

ވެރިކަން ކުރާ ޕީއެންސީން ނެރުނު ބަޔާނުގައި ބުނީ އެ ޕާޓީން ދެކޭ ގޮތުގައި ރާއްޖޭގައި ރަޖިސްޓްރީ ކޮށްގެން ހިންގައި ސިޔާސީ ޕާޓީއަކުން ނޫނީ މަދަނީ ޖަމުއިއްޔާ އަކުން ރާއްޖޭގެ ފަތުރުވެރި ކަމަށް އަދި ދިވެހި އިގުތިސާދަށް ފޫނުބެއްދޭ ވަރުގެ ގެއްލުމެއް ލިބިދާނެ ފަދަ ނުރައްކާތެރި ކަމެއް ނުކުރާނެ ކަމަށެވެ.

ޕީއެންސީން ބުނީ ދައުލަތުގެ އިދާރާ ތަކާއި ސިޔާސީ ޕާޓީ ތަކާއި މަދަނީ ޖަމުއިއްޔާ ތަކުގެ އިތުރުން އާއްމު ރައްޔިތުން ވެސް ހަރަކާތްތެރިވާން ވާނީ ގާނޫނީ އިމުގެ ތެރެއިން ކަމަށެވެ.

އޭގެ އިތުރުން ރާއްޖެއަކީ ފަތުރުވެރީންނަށް ރައްކާތެރި މަންޒިލެއްގެ ގޮތުގައި ބޭއްވުމަށް ސަރުކާރުން ކެނޑިނޭޅި މަސައްކަތް ކުރަމުން ދާކަމަށް އެ ޕާޓީން ބުންޏެވެ.

ހަމަ އެހެންމެ، ފަތުރުވެރި ކަމުގެ ސިނާއަތުގައި އިންވެސްޓު ކޮށްފައިވާ ފަރާތް ތަކުގެ އިންވެސްޓްމަންޓުތައް ރައްކާތެރި ކޮށްދިނުމުގައި ދިވެހި ދައުލަތުން އަދާ ކުރާންޖެހޭ ޒިންމާ އެންމެ ފުރިހަމަ އަށް އަދާ ކުރާނެ ކަމުގެ އިތުބާރު އެބައޮތް ކަމަށް ވެސް ޕީއެންސީން ބުނެފައިވެ އެވެ.

ކޮންގްރެސް ހައުސްގައި ރޭ ބޭއްވި ހަރުގެ ޖަލްސާގައި ނިހާދު ދެއްކެވިި ވާހަކަތަކާއި ގުޅުވައިގެން އޭނާ ވަނީ ސްޓޭޓް މިނިސްޓަރުކަމުން މިއަދު ސަސްޕެންޑުކޮށްފަ އެވެ