ލަންކާގެ މާލީ ހާލަތު ރަނގަޅުވާން ފެށުމާއި އެކު ބައިނަލްއަޤްވާމީ ކްރެޑިޓް ރޭޓިން އޭޖެންސީ މޫޑީސްއިން ލަންކާގެ ކްރެޑިޓް ރޭޓިން 'ސީއޭ'އިން 'ސީއޭއޭ1'އަށް މަތިކޮށްފިއެވެ.
މޫޑީސްއިން ނެރުނު ރިޕޯޓުގައި ބުނެފައިވަނީ ލަންކާގެ އާމްދަނީއާއި ދަރަނި މެނޭޖުކުރުން ދެމެހެއްޓެނިވި ގޮތެއްގައި ކުރިއަރާނެ ކަމުގެ އުއްމީދު އޮތް ކަމަށެވެ. އަދި ދަރަނި ޑީފޯލްޓްވުމުގެ ނުރައްކާ ކުޑަވެ، ބޭރުގެ ގޮންޖެހުންތަކުން އޮތް ނުރައްކާވެސް ކުޑަވެފައިވާ ކަމަށް ފާހަގަކޮށްފައިވެއެވެ.
ރޭޓިން މަތިކުރި މައިގަނޑު ސަބަބެއްގެ ގޮތުގައި ފާހަގަކޮށްފައިވަނީ ލަންކާގެ 12.55 ބިލިއަން ޑޮލަރުގެ އިންޓަނޭޝަނަލް ސޮވެރިން ބޮންޑްތައް ގަނެފައިވާ ކްރެޑިޓަރުންނާއެކު ދަރަނި ރީސްޓްރަކްޗަރ ކުރުމަށް އެއްބަސްވުމަކަށް އާދެވިފައިވުމެވެ. މީގެ އިތުރުން އައިއެމްއެފް ފަދަ އިދާރާތަކާ ގުޅިގެން އަޅަމުންދާ އިޞްލާޙީ ފިޔަވަޅުތައްވެސް ފާހަގަކޮށްފައިވެއެވެ.
ނަމަވެސް، ލަންކާއަށް އާމްދަނީ ލިބޭނެ ގޮތްތައް އަދިވެސް މަދުވުމާއި ބޭރުގެ އެހީއަށް ބަރޯސާވުމަކީ އިޤްތިޞާދަށް އޮތް ނުރައްކަލެއްގެ ގޮތުގައި މޫޑީސްއިން ފާހަގަކޮށްފައިވެއެވެ. ލަންކާގެ އިޤްތިޞާދީ ޙާލަތު ދަށްވެފައިވަނީ ގިނަ އަހަރުތަކެއް ވަންދެން ސަރުކާރުތަކުން ވެފައިވާ އިހުމާލުތަކުގެ ސަބަބުންނާއި، 2019 ގެ ޓެރަރިސްޓު ހަމަލާތަކާއި ކޮވިޑް-19 ގެ އަސަރުތަކުންނެވެ.
ލަންކާގެ އައު ސަރުކާރުން މިހާރު ގެންދަނީ އައިއެމްއެފްގެ ހަރުކަށި ޝަރުތުތަކަށް ލުއިތައް ހޯދުމަށް މަސައްކަތްކުރަމުންނެވެ. މޫޑީސްގެ މި ރިޕޯޓާއެކު ލަންކާގެ އިޤްތިޞާދީ މުސްތަޤުބަލާމެދު އުއްމީދީ ނަޒަރަކުން ބެލުމުގެ ފުރުޞަތު ލިބިގެންދާނެ ކަމަށް ބެލެވެއެވެ.
ކޮމެންޓް