އާސެނަލްގެ ތަރި ބުކާޔޯ ސަކާ އަށް އަނިޔާވެ ގިނަ ހަފްތާތަކެއް ވަންދެން ކުޅުމާ ދުރުގައި ހުންނަން ޖެހޭނެ ކަމަށް އެ ޓީމުގެ ކޯޗު މިކޭލް އާޓެޓާ ބުނެފިއެވެ.
ކްރިސްޓަލް ޕެލަސްއާ ދެކޮޅަށް ކުޅުނު މެޗުގައި ސަކާ ބަދަލުކުރަން ޖެހުނީ ފަލަމަސްގަނޑަށް އަނިޔާވެގެންނެވެ.
އާޓެޓާ ބުނި ގޮތުގައި ސަކާގެ އަނިޔާ ރަނގަޅު ނޫން ކަމަށާއި، ގިނަ ހަފްތާތަކަކަށް ކުޅުމާ ދުރުގައި ހުންނަން ޖެހޭނެ ކަމަށެވެ. މިހާރު ކްލަބުން އިސްކަން ދެނީ ސަކާ އަށް ކޮށްދޭން ޖެހޭ ކަންތައްތަކަށް ކަމަށާއި، މުޅި އާސެނަލް ޓީމުން މިތިބީ ސަކާއާ އެކުގައި ކަމަށް އާޓެޓާ ބުނެފައިވެއެވެ.
"ސަކާ އަކީ މުހިންމު ކުޅުންތެރިއެއް. މިހާރު ފޯކަސް ހުރީ ސަކާއާ ނުލައި ކުރިއަށް ހުރި މެޗުތަކުގައި ކުޅެން ޖެހޭ ޕްލޭން ތައްޔާރުކުރަން," އާޓެޓާ ބުންޏެވެ.
މިއީ ސަކާ އަށް މި ސީޒަނުގައި ކުރިމަތިވި ފަލަމަސްގަނޑުގެ ތިންވަނަ އަނިޔާއެވެ. ސަކާ ނުލައި އާސެނަލް ކުޅުނު 73 މެޗުން އެ ޓީމު މޮޅުވެފައިވަނީ 41 މެޗުންނެވެ. 22 މެޗުން ބަލިވިއިރު، 10 މެޗު ވަނީ އެއްވަރުވެފައެވެ.
މިހާރު ލީގުގެ އެއްވަނައިގައި އޮތް ލިވަޕޫލަށް 16 މެޗުން 39 ޕޮއިންޓް ލިބިފައިވާއިރު، އާސެނަލް އޮތީ ތިންވަނައިގައި 17 މެޗުން 33 ޕޮއިންޓާ އެކުގައެވެ. ސަކާގެ އަނިޔާއާ ގުޅިގެން އާސެނަލްގެ ޕަފޯމަންސަށް އަންނާނެ ބަދަލަކަށް ގިނަ ބަޔަކު ބަލަމުންދާނެއެވެ.
ކޮމެންޓް