ޕީއެސްއެމްގެ މެނޭޖިން ޑިރެކްޓަރަކަށް އިބްރާހީމް ނަސްރީން

ޕަބްލިކް ސާވިސް މީޑީއާ (ޕީއެސްއެމް)ގެ އައު މެނޭޖިން ޑިރެކްޓަރުގެ މަގާމު، އެ ކުންފުނީގެސޭލްސް އެންޑް މާކެޓިން ޑިރެކްޓަރުގެ މަގާމުގައި  ހުންނެވި އިބްރާހީމް ނަސްރީން އަށް ދީފި އެވެ.

ނަސްރީން ޕީއެސްއެމްގައި މަސައްކަތް ކުރައްވާތާ ނުވަ ވަރަކަށް އަހަރު ވެއްޖެ އެވެ.

އޭނާ ވަނީ އެ މުއްދަތުގައި ކުންފުނީގައި ސޭލްސް އެންޑް މާކެޓިން ޑިރެކްޓަރުގެ މަގާމު ވެސް އަދާކުރައްވާފަ އެވެ.

މަތީ ދަރަޖަ ހޯދައި ފަރާތް ތަކަށް ރައީސުލްޖުމްހޫރިއްޔާ ދެއްވައި ހާއްސަ އިނާމު ހާސިލު ކުރައްވާފައިވާ ނަސްރީނަކީ މެލޭޝިއާގެ ލިމްކޮކް ޔުނިވާސިޓީން ބެޗްލާސް ޑިގްރީ ހާސިލު ކުރައްވައިގެން ހުންނެވި ފަރާތެކެވެ.

އޭގެ އިތުރުން ތައިލެންޑުގެ ކޮލެޖް އޮފް އިނޮވޭޝަން އެޓް ތަމަސަޓް ޔުނިވާސިޓީން ސާވިސް އިނޮވޭޝަންގެ ދާއިރާއިން މާސްޓާސް ޑިގްރީ ހާސިލު ކުރައްވައިފައިވެ އެވެ.

ޕީއެސްއެމް އެމްޑީގެ މަގާމު ހުސްވީ އެ މަގާމުގައި އެންމެ ފަހުން ހުންނެވި މުޙައްމަދު ސައީދު މިދިޔަ އަންގާރަ ދުވަހު އިސްތިއުފާ ދެއްވުމުންނެވެ. އޭނާ އެ މަގާމަށް އައްޔަން ކޮށްފައި ވަނީ އޮގަސްޓު މަހުގެ ތެރޭގަ އެވެ.

ރައީސް ޑރ. މުޙައްމަދު މުއިއްޒު ވެރިކަމާ ހަވާލުވެވަޑައިގެންނެވުމަށްފަހު، ޕީއެސްއެމްގެ މެނޭޖިން ޑިރެކްޓަރު ކަމަށް ފުރަތަމަ ހަމަޖެއްސެވީ ޒީނާ ޒާހިރެވެ.

އޭނާއަކީ މި މަގާމަށް އައްޔަނުކުރެވުނު ފުރަތަމަ އަންހެން ބޭފުޅާވެސްމެ އެވެ.