ކްލަބް ޕޯލްސްޓާއިން އިންތިޒާމުކޮށްގެން ބޮޑުތިލަދުންމަތީގައި ބާއްވާ އެންމެ އަގުބޮޑު ފުޓުބޯޅަ މުބާރާތް “މައިކަޕް”ގެ ތިންވަނަ މެޗްގައި މިއަދު ހަވީރު ބައްދަލު ކުރާނީ ބީބީ ބްރަދާސް (ހދ ނޮޅިވަރަމް) އާއި ހއ.އުލިގަމެވެ.
މި މުބާރާތުގައި ޖުމްލަ 9 ޓީމު ވާދަ ކުރާއިރު ހއ އަތޮޅުން ބޭރުން ހަމައެކަނި މި މުބާރާތުގައި ވާދަ ކުރާ ޓީމަކީ ބީބީ ބްރަދާސްއެވެ. އެހެންކަމުން، މިއީ މުޅި ހއ އޮތް އެންމެ ބޮޑު ޖެލެންޖް ކަމަށް ބުނެވިދާނެއެވެ. ބީބީ ބްރަދާސް އިން މުބާރާތް ކާމިޔާބު ކޮށްފިނަމަ މައިކަޕްގެ ތާރީހުގައިވެސް ފުރަތަމަ ފަހަރަށް މުބާރާތުގެ ތަށި އަތޮޅުން ބޭރުވީއެވެ.
ނޮޅިވަރަމް ޓީމުގެ ސްކޮޑަށް ބަލާއިރު އެންމެ ބޮޑަށް ފާހަގަކޮށްލެވޭ ކުޅުންތެރިއަކީ މުޅި ޓީމް އެ ކުޅުންތެރިއަކަށް ބަރޯސާވެފައިވާ ސާލިމް (ލިމޭ)އެވެ. ލިމޭ އަކީ މުޅި ބޮޑުތިލަދުންމަތީގައިވެސް ވިދުން ގަދަ ޒުވާން ކުޅުންތެރިއެވެ. ރަށާއި އަތޮޅު ފެންވަރުގެ ގިނަ މުބާރާތްތަކެއްގައި ކުޅު އެ މުބާރާތްތަކުގެ އެންމެ ޝަރަފުވެރި މަޤާމު ތަކުރާރުކޮށް ލިމޭ ހޯދާފައިވެއެވެ.
ލިމޭ—
މީގެ އިތުރުން، ޔަމީން އާއި ޑީޖޭ އަކީވެސް ފާހަގަ ކޮށްލެވޭ ދެ ކުޅުންތެރިންނެވެ. ބިމަށް ވަރުގަދަ، ދުވެލި ބާރު މި ދެ ކުޅުންތެރިން ހިފެއްޓުމަކީ އުލިގަމަށް ފަސޭހަކަމަކަށް ނުވާނެއެވެ. ހަމައެހެންމެ، ހދ ކުރިނބީއަށް ނިޞްބަތްވާ ކުޅުންތެރިއަކާއި ހިރިމަރަދުއަށް ނިޞްބަތްވާ ކުޅުންތެރިއެއްވެސް ޓީމުގައި ހިމެނެއެވެ.
ޓީމުގެ ތައްޔާރީތަކާ ގުޅޭގޮތުން ދެލި އޮންލައިން އަށް މަޢުލޫމާތު ދެއްވަމުން ޓީމު މެނޭޖަރ ޙުސައިން އިބްރާޙިމް ބުނީ ޓީމު އޮތީ މުބާރާތަށް ވަރަށް ފުރިހަމަށް ތައްޔާރުވެފައި ކަމަށާއި މޫސުން ކިރިޔާވެސް ތަންދޭނަމަ ސަޕޯޓަރުންވެސް މިއަދު އިހަވަންދޫއަށް ދާނެ ކަމަށެވެ.
ޑީޖޭ—
ބޮޑުތިލަދުންމަތީގެ އެންމެ ޝަރަފުވެރި މުބާރާތް، މައިކަޕްގެ ބާނީއަކީ އިހަވަންދޫ ދާއިރާގެ ކުރީގެ މެމްބަރު މުހައްމަދު އަބުދުﷲ (މުހައްމާ) އެވެ. 2007 ވަނަ އަހަރުންފެށިގެން މިހާތަނަށް މައިކަޕްގެ 13 މުބާރާތެއް ބާއްވާފައިވާއިރު، މިއީ މިސަރަހައްދުގައި ބާއްވާ އެންމެ ވަރުގަދަ އެއް މުބާރާތެވެ. މިއަހަރު ބާއްވާ މައިކަޕް ފުޓްބޯޅަ މުބާރާތުގެ ޓައިޓަލް ސްޕޮންސަރ ކޮށްފައިވަނީ ބިއުޓިފުލް ބްލޫއެވެ.
ބިއުޓިފުލް ބްލޫއިން މުބާރާތުގެ ފޯރި ގަދަކުރުމަށް ތަފާތު ހަރަކާތްތަކެއް ކުރިޔަށް ގެންދާނެކަންވަނީ އިއުލާންކޮށްފައެވެ. މިއަހަރުގެ މައިކަޕްގެ ޗެމްޕިއަން ޓީމަށް 100،000 ރުފިޔާ އަދި ރަނަރަޕް ޓީމަށް 35،000 ރުފިޔާގެ ފައިސާގެ އިނާމެއް ދިނުމަށް ވަނީ ނިންމައިފައެވެ.
ކޮމެންޓް