މަރުވެފައި އޮތް މީހަކު އަނެއްކާވެސް މާލެއިން ފެނިއްޖެ

މާލޭގެ ގެއެއްގެ ތެރެއިން މަރުވެފައި އޮތް މީހަކު ރޭ ފެނިގެން އެ މައްސަލަ ތަހުގީގު ކުރަމުން އަންނަ ކަމަށް ފުލުހުން މިއަދު ބުނެފި އެވެ.

ފުލުހުން މީޑިއާތަކަށް ފޮނުވި މެސެޖެއްގައި ބުނެފައިވަނީ ގަލޮޅުގައި ހުންނަ ގެއެއްގެ ތެރޭގައި ހަބަރު ހުސްވެފައި އޮތް މީހަކު ފެނިގެން ފުލުހުންނަށް ރިޕޯޓްކުރީ ރޭ ދަންވަރު 1:27 ހާއިރު ކަމަށެވެ. އަދި އެ މީހާ އައިޖީއެމްއެޗަށް ގެންދިޔަ އިރު ވެސް ވަނީ މަރުވެފައި ކަމަށް ފުލުހުން ބުނެފައިވެ އެވެ.

މަރުވެފައި ވަނީ ދާއޫދު ޝިމްރީޒް (45 އަހަރު، ގ. ބިއުޓީ ވިލާ) ކަމަށް ފުލުހުން ބުނެފައިވެ އެވެ. "މި މައްސަލަ ފުލުހުން ގެންދަނީ ތަހުގީގު ކުރަމުން،" އިތުރު ތަފްސީލެއް ނުދީ ފުލުހުން ބުންޏެވެ.

ގަލޮޅުގައި ހުންނަ ގެއެއްގެ ތެރެއިން އިއްޔެ ހަވީރު ވެސް ވަނީ މަރުވެފައި އޮތް މީހަކު ފެނިފައިވުމެވެ. ނަމަވެސް، ރޭ މީހަކު ފެނުނީ އެހެން ގެއަކުން ކަމަށް ފުލުހުން މިއަދު ބުންޏެވެ.

އާންމު ގޮތެއްގައި މިފަދަ މައްސަލައެއް ފުލުހުން ތަހުގީގުކުރާ ކަމަށް ބުނަނީ، އެ މަރެއްގައި ޝައްކުކުރެވޭ ކަންތައްތަކެއް ހުރެއްޖެ ނަމަ އެވެ. މީގެ ކުރިން ވެސް މާލޭގެ ބައެއް ގޭގެއިން މީހުން މަރުވެފައި އޮއްވާ ފެނެ އެވެ. އޭގެ ތެރެއިން ބައެއް މީހުން މަރުވެފައި ވަނީ މަސްތުވާތަކެއްޗަށް އޯވާޑޯސް ވެގެންނެވެ.