އެމެރިކާއިން ސީރިއާގެ އާ ލީޑަރު ހައްޔަރުކުރުމަށް ހުށަހެޅި އިނާމު އަނބުރާ ގެންގޮސްފި

ސީރިއާގެ އާ ލީޑަރު އަހުމަދު އަލް ޝަރުޢާ ހައްޔަރުކޮށްދޭ ފަރާތަކަށް ދޭން އެމެރިކާއިން ކަނޑައަޅާފައިވާ 10 މިލިއަން ޑޮލަރުގެ އިނާމު އަނބުރާ ގެންގޮސްފައެވެ.

މި ނިންމުން އިޢުލާންކުރެއްވީ އެމެރިކާގެ އެސިސްޓެންޓް ސެކްރެޓަރީ އޮފް ސްޓޭޓް ފޯ ނިއާ އީސްޓަން އެފެއާޒް ބާބަރާ ލީފް އެވެ.

ލީފް މި ނިންމުން އިޢުލާންކުރެއްވީ ދިމިޝްޤުގެ އާ ލީޑަރުންނާ ބައްދަލުކުރެއްވުމަށްފަހުގައެވެ. މިއީ ހަޔާތު ތަހުރީރު އަލް ޝާމް (އެޗްޓީއެސް) ގްރޫޕުން ސީރިއާގެ ކުރީގެ ރައީސް ބައްޝާރުލް އަސަދު ވެރިކަމުން ދުރުކުރި ފަހުން އެމެރިކާގެ ޑިޕްލޮމެޓުން ސީރިއާއަށް ކުރެއްވި ފުރަތަމަ ދަތުރުފުޅެވެ.

ލީފް ވިދާޅުވީ އެމެރިކާއިން މި ނިންމުން ނިންމީ ހުކުރު ދުވަހުގެ މަޝްވަރާތަކުގައި އުއްމީދީ ވާހަކަތަކެއް އަޑުއިވުމުންނެވެ. އެމެރިކާއިން ބޭނުންވަނީ ސީރިއާގެ ދާޚިލީ ހަނގުރާމައިގެ ތެރޭގައި ގެއްލުނު އެމެރިކާގެ ބައެއް މީހުންނަށް ވީގޮތް ހޯދުމަށް ކަމަށް ވެސް ރިޕޯޓުތަކުގައި ބުނެފައިވެއެވެ.

އެމެރިކާއިން ވަނީ ގާތްގަނޑަކަށް 2,000 ސިފައިން ސީރިއާގައި ތިބި ކަމަށް އެއްބަސްވެފައެވެ. މިއީ ކުރިން ލަފާކުރި އަދަދަށް ވުރެ ދެގުނަ އިތުރު އަދަދެކެވެ. އެމެރިކާއިން ސީރިއާއަށް ސިފައިން ފޮނުވަން ފެށީ 2014 ވަނަ އަހަރު އައިއެސް ބަލިކުރުމުގެ މަޤްޞަދުގައެވެ.

އެޗްޓީއެސްއާއެކު ވާހަކަތައް ދެއްކި ނަމަވެސް، 2018 ވަނަ އަހަރު އެމެރިކާއިން ވަނީ އެ ޖަމާޢަތަކީ ޓެރަރިސްޓު ޖަމާޢަތެއް ކަމަށް ކަނޑައަޅާފައެވެ. އަލް ޝަރުޢާއަކީ މި ޖަމާޢަތުގެ ލީޑަރެވެ. މި އިނާމު އަނބުރާ ގެންދިއުމަކީ ސީރިއާގެ އާ ވެރިކަމާމެދު އެމެރިކާގެ ސިޔާސަތަށް އައި ބަދަލެއްގެ ނިޝާނެއް ކަމަށް ބެލެވެއެވެ.