ފުލުހުންގެ އިކޮނޮމިކް ކްރައިމްގެ ވެރިޔާ، ރަޖުނީއަށް ކުރެވޭ ތުހުމަތު ބަލަނީ

ފުލުހުންގެ އިކޮނަމިކް ކްރައިމް އިންވެސްޓިގޭޝަންގެ ހެޑު، ސުޕްރިޓެންޑެންޓް ރަޖުނީ ޝުއައިބު އާއި އޭނާގެ އަނބިމީހާ އަށް އުސޫލުން ބޭރުން ވިނަރެސް ފްލެޓް ލިބުނު ކަމަށް ބުނެ ސޯޝަލް މީޑިއާގައި ކުރަމުން އަންނަ ތުހުމަތުތަކާ ގުޅުވައިގެން އެކަން ބަލަމުން އަންނަ ކަމަށް ފުލުހުން ބުނެފި އެވެ.

ރަޖުނީގެ ނަން ވިނަރެސް ފުލެޓު ލިބުނު މީހުންގެ ދާއިމީ ލިސްޓުގައި ނެތީސް އޭނާއަށް ފުލެޓު ދީފައިވާ ކަމަށް ބުނާ ޑޭޓާތަކެއް ވަނީ ސޯޝަލް މީޑިއާގައި ދައުރުވާން ފަށާފަ އެވެ.

މިކަމާ ގުޅުވައިގެން ފުލުހުންގެ ތަރުޖަމާނު އަހުމަދު ޝިފާން "އެކްސް" ގައި ކުރެއްވި ޕޯސްޓެއްގައި ވިދާޅުވީ ރަޖުނީއާ ގުޅިގެން ދެކެވޭ ވާހަކަތައް ފުލުހުން ބަލަމުންދާ ކަމަށެވެ.

"ރަޖުނީ ޝުޢައިބާއި ގުޅޭގޮތުން ސޯޝަލް މީޑިއާގައި އާންމުކުރަމުންދާ މަޢުލޫމާތާ ގުޅިގެން ދިވެހި ފުލުހުންގެ ހިދުމަތުން ބަލަންޖެހޭ ކަންކަން ބަލަމުންދާ ވާހަކަ ދަަންނަވަމެވެ" ޝިފާން ވިދާޅުވި އެވެ.

ގޯތި ވައްކަމުގެ މައްސަލައިގެ އިތުރުން ކޮރަޕްޝަންގެ އެފަދަ މައްސަލަތައް ބަލައި، އިކޮނޮމިކް ކްރައިމްގެ އެންމެ އިސް ވެރިއަކަށް ހުންނެވި، ފަރާތެއްގެ މައްޗަށް މިފަދަ ތުހުމަތެއް ކުރެވުމާ އެކު އާންމު ރައްޔިތުން އަންނަނީ އެ މުއައްސަސާއަށް ފާޑުކިޔުން އަމާޒު ކުރަމުންނެވެ.