ޖަރުމަން ބުންޑެސްލީގާގައި ރޭ ލެއިޕްޒިގް އާއި ދެކޮޅަށް ބަޔާން މިއުނިކް ކުޅުނު މެޗު 5-1 ގެ ނަތީޖާއަކުން ބަޔާން މިއުނިކް މޮޅުވެ ތާވަލުގެ އެއްވަނައިގައި އެހެން ޓީމުތަކާއި ދެމެދުވާ ފަރަގު ބޮޑުކޮށްފިއެވެ.
މި މެޗު ކާމިޔާބު ކުރުމާއެކު ބަޔާން މިއުނިކް އޮތީ ލީގުގައި މިހާތަނަށް ކުޅުނު 15 މެޗުން 36 ޕޮއިންޓާއެކު ތާވަލުގެ އެއްވަނައިގައެވެ.
ދެވަނައިގައި އޮތް ބެޔާ ލެވަކޫސަން އަށް 14 މެޗުން ލިބިފައިވަނީ 29 ޕޮއިންޓެވެ. މިއީ ބަޔާން މިއުނިކްއާ އަޅާބަލާއިރު 7 ޕޮއިންޓުގެ ފަރަގެކެވެ.
މިއުނިކްގެ އެލިއަންޒް އެރީނާގައި ކުޅުނު މި މެޗުގެ ފުރަތަމަ މިނިޓުގައި ބަޔާން މިއުނިކްގެ ޖަމާލް މުސިއާލާ ވަނީ ލަނޑެއް ޖަހާ އެ ޓީމަށް ކުރި ހޯދައިދީފައެވެ. ނަމަވެސް މިނިޓެއްވެސް ނުވަނީސް ލެއިޕްޒިގްގެ ބެންޖަމިން ސެސްކޯ ވަނީ އެ ޓީމަށް ލަނޑެއް ޖަހައިދީ މެޗުގެ ނަތީޖާ އެއްވަރުކޮށްފައެވެ.
މި މެޗުގައި ބަޔާން މިއުނިކް އިން ދެވަނަ ފަހަރަށް ކުރި ހޯދާފައިވަނީ މެޗުގެ 25 ވަނަ މިނިޓުގައި ކޮންރެޑް ލެއިމަރ ކާމިޔާބުކޮށްދިން ލަނޑުންނެވެ. އޭގެ 11 މިނިޓު ފަހުން މުސިއާލާގެ އެސިސްޓަކުން ޖޯޝުއާ ކިމިޗް ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.
މެޗުގެ ދެވަނަ ހާފުގައި ބަޔާން މިއުނިކް އިތުރު ދެ ލަނޑު ޖެހިއެވެ. 75 ވަނަ މިނިޓުގައި ލެރޮއި ސާނޭ ހަތަރުވަނަ ލަނޑު ޖެހި އިރު، 78 ވަނަ މިނިޓުގައި އަލްފޮންސޯ ޑޭވީސް ވަނީ ފަސްވަނަ ލަނޑު ޖަހާފައެވެ.
ކޮމެންޓް