ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރަމަންޓް މިނިސްޓްރީގެ އިތުރުން މާލެ ސިޓީ ކައުންސިލްގެ ރަޖިސްޓްރޭޝަނާ ބެހޭ ބައި ހުންނަ މ. ގްރީން ބިލްޑިން އިމާރާތުގައި މިމަހުގެ 12 ވަނަ ދުވަހު ހިނގި އަލިފާނުގެ ހާދިސާ ތަހުގީގު ކުރުމަށް ބޭރުގެ ޓީމެއް ރާއްޖެ އަތުވެއްޖެ އެވެ.
ފުލުހުން މިއަދު ވަނީ އަލިފާނުގެ ހާދިސާގެ ތަހުގީގަށް ބޭރުގެ ޓީމަކުން ރާއްޖޭގައި ހަރަކާތްތެރިވަމުން އަންނަކަން ކަށަވަރުކޮށްދީފަ އެވެ.
ކޮމިޝަނަރު އޮފް ޕޮލިސް އަލީ ޝުޖާއު މިއަދު މީޑިއާތަކާ ހިއްސާ ކުރެއްވި މެސެޖުގައި ވިދާޅުވެފައި ވަނީ އަލިފާނުގެ ހާދިސާއާ ގުޅިގެން ކުރެވެމުންދާ ތަހުގީގުގައި، އިންޑިއާގެ ތަޖުރިބާކާރުންގެ ހާއްސަ ޓީމެއް މިހާރު އަންނަނީ ފުލުހުންނާ އެކު ހަރަކާތްތެރިވަމުން ކަމަށެވެ.
މި އަލިފާނުގެ ހާދިސާގެ ތަހުގީގަށް ބޭރުގެ އެހީތެރިކަން ހޯދާފައިވާއިރު، މި ހާދިސާގެ ތަހުގީގަށް ބޭނުން ކުރެވިދާނެ އެއްވެސް މައުލޫމާތެއް އެނގޭ ފަރާތެއް ހުރި ނަމަ އެ މައުލޫމާތު ހިއްސާ ކޮށްދިނުމަށް ފުލުހުން އެދިފައިވެ އެވެ.
އަދި ހާދިސާ ހިނގަން މެދުވެރިވި ސަބަބު ވެސް އަދި އެނގިފައެއް ނުވެއެވެ.
ހައުސިން މިނިސްޓްރީ، ކޮންސްޓްރަކްޝަން މިނިސްޓްރީ އަދި އެންވަޔަރަމެންޓް މިނިސްޓްރީގައި ރޯވި އަލިފާނުގެ ހާދިސާގައި މާލޭ ސިޓީ ކައުންސިލްގެ އޮފީހުގައި ވެސް އަލިފާން ރޯވެ، މުހިންމު ލިޔެކިޔުންތަކެއް އަނދާފައިވެ އެވެ.
އަލިފާނުގެ ހާދިސާއާ ގުޅިގެން އެ ތިން މިނިސްޓްރީ ވަގުތީ ގޮތުން ހިންގަމުން އަންނަނީ ދަރުބާރުގޭގަ އެވެ.
އޭގެ އިތުރުން ސިޓީ ކައުންސިލްގެ ހުއްޓިފައިވާ ބައެއް ހިދުމަތްތައް ވެސް މިވަގުތު ދެމުން އަންނަނީ ދަރުބާރު ގެއިންނެވެ.
ކޮމެންޓް