އެންޓިކޮރަޕްޝަން ކޮމިޝަން (އޭސީސީ)ގެ ހުސްވެފައިވާ ދެ މަގާމަށް މެންބަރުން އައްޔަން ކުރުމަށް ޓަކައި މެމްބަރު ކަމަށް ކުރިމަތި ލުމުގެ ފުރުސަތު މިއަދު ރައީސުލްޖުމްހޫރިއްޔާގެ އޮފީހުން އަލުން ހުޅުވާލައިފި އެވެ.
އެ ކޮމިޝަންގެ މެމްބަރު ކަމަށް ކުރިމަތިލާން ފުރަތަމަ ފަހަރު ހުޅުވައިލީ މި މަހުގެ އަށް ވަނަ ދުވަހު އެވެ.
ރައީސް އޮފީހުން ބުނީ އޭސީސީން ހުސްވެފައިވާ ދެ މަގާމަށް ކުރިމަތި ލުމުގެ ފުރުސަތު މިއަދުން ފެށިގެން 31 ޑިސެންބަރުގެ 12:00 ގެ ނިޔަލަށް ހުޅުވާލައިފައިވާ ކަމަށެވެ.
އެހެންވެ، މެމްބަރު ކަމަށް އެދޭ ފޯމާއި، އެހެނިހެން ލިޔެކިޔުންތައް ބަލައިގަތުމަށް ހަމަޖެހިފައި ވަނީ، މިކަމަށް ކުރިތިމަލުމަށް ދީފައިވާ މުއްދަތުގައި ރަސްމީ ދުވަސް ދުވަހުގެ ހެނދުނު 08:30 އިން 12:00 އަށް ރައީސުލްޖުމްހޫރިއްޔާގެ އޮފީހުންނެވެ.
އޭސީސީގެ ދެ މެމްބަރެއްގެ މަގާމު ހުސްވެފައި ވަނީ ނައިބު ރައީސް އަބްދުއްސަލާމް އާއި މެމްބަރު ތޯހާ މުޙައްމަދު އިސްތިއުފާ ދެއްވުމުންނެވެ.
ދެ މެމްބަރުން އިސްތިއުފާ ދެއްވީ އެބޭފުޅުންނާ ގުޅޭގޮތުން ހުށައެޅި ސުލޫކީ މައްސަލަ ތަކެއް ރައްޔިތުންގެ މަޖިލީހުގެ މިނިވަން މުއައްސަސާ ތަކުގެ ކޮމިޓީން ބަލައި އެ މެމްބަރުން ވަކިކު ރުމަށް ނިންމާފައި ވަނިކޮށެވެ.
އެ ކޮމިޓީން ބުނެފައި ވަނީ އޭސީސީގެ ގާނޫނުގައި އެ ކޮމިޝަނުގެ ވާޖިބު އަދާ ކުރުމުގައި މެންބަރުން ބިރަކަށް ނުވަތަ ނުފޫޒަކަށް ލެނބިގެން ނުވާނެ ކަމަށާއި އަމިއްލަ މަސްލަހަތު ހާސިލު ކޮށްގެން ނުވާނެ ކަމަށް ބަޔާންކޮށްފައިވާ މާއްދާތަކާ ވަނީ އެ ދެ މެންބަރުން ހިލާފުވެފައި ކަމަށެވެ.
މަގާމުން އިންތިއުފާ ދެއްވުމަށްފަހު އެ ދެ މެމްބަރުން ފޮނުއްވި ސިޓީގައި އެ ވާހަކަތައް ދޮގު ކުރަމުން ބުނެފައި ވަނީ އެއީ އެއްވެސް އަސާސެއް ނެތް ތުހުމަތު ތަކެއް ކަމަށެވެ.
ކޮމެންޓް