މާލޭގައި މުޑުދާރުކޮށް ކާބޯތަކެތި ތައްޔާރުކުރާ ތަނެއް ރެއިޑްކޮށް، ބިދޭސީއަކު އިމިގްރޭޝަނުން އަތުލައިގެންފި އެވެ.
އިމިގްރޭޝަނުން ބުނީ، އެތަނަށް ލިބުނު ރިޕޯޓަކާ ގުޅިގެން ޓާސްކްފޯހުން ރޭ މާލޭ ހެންވޭރުގައި ހުންނަ ގެއެއް ބަލައި ފާސްކޮށްފައިވާ ކަމަށެވެ.
އެ ތަނަކީ އާންމު މިންގަނޑުތަކާ ހިލާފަށް ދިވެހި އުފެއްދުންތައް ވިޔަފާރީގެ ބޭނުމަށް ތައްޔާރު ކުރަމުންދާ ތަނެއް ކަމަށާއި އެ ތަނުން ފިހާރަތަކުން އާންމުކޮށް ލިބެން ހުންނަ ގިނަ ބާވަތްތަކުގެ ކާބޯތަކެތި ފެނިފައިވާ ކަމަށް އިމިގްރޭޝަނުން ބުންޏެވެ
އިމިގްރޭޝަނުން ބުނީ އެ ތަނުގައި ގަވާއިދާ ހިލާފަށް މަސައްކަތް ކުރަމުން ދިޔަ ބިދޭސީ މީހާ، އެ އިދާރާގެ ބެލުމުގެ ދަށަށް މިހާރު ގެނެސްފައިވާ ކަމަށެވެ.
އިމިގްރޭޝަނާއި ފުލުހުން ގުޅިގެން ރާއްޖޭގައި ގަވާއިދާއި ހިލާފަށް މަސައްކަތް ކުރުމާއި ވިޔަފާރި ކުރާ ބިދޭސީން ހޯދުމަށް އޮޕަރޭޝަންތަކެއް އަންނަނީ ހިންގަމުންނެވެ.
އެ އޮޮޕަރޭޝަންގެ ތެރެއިން، ސާފުތާހިރުކަން ކުޑަ ތަންތަނުގައި ކާބޯތަކެތި ތައްޔާރުކޮށް ވިއްކާ ގިނަ އަދަދެއްގެ ބިދޭސީން މިހާތަނަށް އަތުލައިގެންފައިވެ އެވެ. އަދި އޭގެ ތެރެއިން ގިނަ މީހުން ޑީޕޯޓުކޮށްލާފައިވެ އެވެ.
ކޮމެންޓް