ހައްޖު ކިޔު ކުޑަ ކުރަން ހަރުދަނާ ފިޔަވަޅެއް އެޅުއްވި ހަމައެކަނި ވެރިއަކީ ރައީސް މުއިއްޒު: ޝަކީލް

ހައްޖު ކިޔު ކުޑަ ކުރުމަށް މިހާތަނަށް އައިއިރު, ހަރުދަނާ ފިޔަވަޅެއް އެޅުއްވި ހަމައެކަނި ވެރިއަކީ ރައީސް ޑރ. މުޙައްމަދު މުއިއްޒު ކަމަށް މޯލްޑިވްސް ހައްޖު ކޯޕަރޭޝަން ލިމިޓެޑްގެ މެނޭޖިން ޑިރެކްޓަރު މުޙައްމަދު ޝަކީލް ވިދާޅުވެއްޖެ އެވެ.

އެމްއެމްޓީވީގައި ވާހަކަދައް ކަވަމުން ޝަކީލް ވަނީ މި ވޭތުވެދިޔަ 11 އަހަރު ދުވަހުގެ ތެރޭގައި ހައްޖު ކިޔު ކުޑަ ކުރުމަށް ޓަކައި ފިޔަވަޅެއް އެޅުންވީ ކޮން ވެރިއެއްތޯ ސުވާލު އުފައްދަވާފަ އެވެ.

"ހަގީގަތަކީ ވޭތުވެދިޔަ އެގާރަ އަހަރުވީއިރު ވެސް ހައްޖު ކިޔު ކުޑަ ކުރުމަށް ޓަކައި ކޮން ވެރިއެއްތޯއޭ ފިޔަވަޅެއް އެޅީ. ކާކުތޯ އޭ ކަމެއް ކޮށްފަ އޮތީ. މިހާތަނަށް އައިއިރު ހައްޖު ކިޔު ކުޑަ ކުރުމަށް ހަމައެކަނި ހަރުދަނާ ފިޔަވަޅެއް އެޅުއްވި ވެރިއަކީ ރައީސުލްޖުމްހޫރިއްޔާ ޑރ. މުއިއްޒު އިނގޭތޯ،" ޝަކީލް ވިދާޅުވި އެވެ.

ޝަކީލް ފާހަގަކުރެއްވި ގޮތުގައި ރާއްޖެއަށް ލިބޭ ރަސްމީ ކޯޓާ އެއްކޮށް ހައްޖު ކޯޕަރޭޝަނާ ހަވާލު ކުރުމަކީ ރައީސް މުއިއްޒު އެޅުއްވި ވަރަށް ހަރުދަނާ ފިޔަވަޅެއް ކަމަށް ރައްޔިތުން ގަބޫލު ކުރެ އެވެ.

އޭނާ ވިދާޅުވީ މީގެ ކުރިން، އެ ކޯޕަރޭޝަނަށް ލިބެނީ ކޯޓާގެ ކޮންމެވެސް މިންވަރެއް ކަމަށާއި އެހެންވެ، ހައްޖަށް ދާން ފުރުސަތު ލިބެނީ އެވަގުތަކު އޮންނަ ކިޔުގެ ތެރެއިން މަދު ބަޔަކަށް ކަމަށެވެ.

އޭގެ ބަދަލުގައި މިހާރުގެ އުސޫލުގައިވާ ގޮތުން ހައްޖު ކޯޕަރޭޝަނަށް ހުރިހާ ކޯޓާއެއް ލިބޭ ކަމުގައިވާ ނަމަ ކިޔުގައި ތިބޭ މީހުންގެ ތެރެއިން ގިނަ ބަޔަކު ހައްޖަށް ގެންދިއުމުގެ ފުރުސަތު ލިބޭ ކަމަށް ޝަކީލް ވިދާޅުވި އެވެ.

"މިހާރު އުސޫލު މި އޮންނަ ގޮތުން ހައްޖު ކޯޕަރޭޝަން މެދުވެރިކޮށް ހައްޖަށް ވަޑައިގަންނަވާ ބޭފުޅުންގެ ތެރެއިން 90 ޕަސެންޓަކީ ފަރުޟު ހައްޖު އަދާކުރައްވާ ފުޅުން. ތަކުރާރުކޮށް ހައްޖު އަދާކޮށްފައި މީހުންނަށް ފުރުސަތު ހަނިވާނެ. އެއީ ހައްޖުގެ އަޅުކަމަކީ އިސްލާމްދީނުގެ ފަސް ރުކުނުގެ ތެރެއިން އެއް ރުކުން. މި އޮންނަނީ ކެރިކުޅަދާނަ ވެގެންވާ ކޮންމެ މުސްލިމެއްގެ މައްޗަށް އުމުރުން އެއްފަހަރު،" ޝަކީލް ވިދާޅުވި އެވެ.

"އެހެންވީމަ ފަރުޟު ހައްޖު އަދާ ކުރުމަށް ޓަކައި ރައީސް ޑރ. މުއިއްޒު އެޅުންވި ވަރަށް ހަރުދަނާ ފިޔަވަޅެއްގެ ގޮތުގައި އަޅުގަނޑު މި ފިޔަވަޅު ފާހަގަ ކޮށްލާނަން،"

ޝަކީލް ވިދާޅުވީ ރައީސް މުއިއްޒުގެ އެދިވަޑައިގަތުމުގެ މަތީން ހައްޖަށް ގެންދާ އަގު ކުޑަ ކުރުމަށް ކެނޑިނޭޅި މަސައްކަތް ކުރަމުން އަންނަ ކަމަށެވެ. އަދި އެ ދުވަސް ދިވެހި ރައްޔިތުންނަށް ދައްކާނެ ކަމުގެ ޔަގީންކަން އޭނާ ދެއްވި އެވެ.

ހައްޖާއި އުމްރާގެ އަޅުކަން އޭގެ އެންމެ ފުރިހަމަ ގޮތުގައި އަދާކުރުމަށް އެހީވެދިނުމުގެ ގޮތުން ހައްޖު ކޯޕަރޭޝަނުގެ ފަރާތުން ގިނަ ހިދުމަތް ތަކެއް ދެމުން ގެންދެ އެވެ.

އެގޮތުން ހައްޖަށްދާ މީހުންގެ ތެރެއިން އުމުރުން ދުވަސްވީ މީހުންނާއި ބޮޑެތި ބަލިތައް ތަހައްމަލު ކުރަމުންދާ ފަރާތް ތަކަށް ހާއްސަ ޖާގަތައް ހަމަޖައްސާފައިވެ އެވެ.