ޖޮޓާގެ ލަނޑުން ފުލަމް އަތުން ލިވަޕޫލް ސަލާމަތް ވެއްޖެ

ލިވަޕޫލާއި ފުލަމް ބައްދަލުކުރި މެޗުގެ ތެރެއިން

އިންގްލިޝް ޕްރިމިއާ ލީގުގައި ތާވަލްގެ އެއްވަނައިގައި އޮތް ލިވަޕޫލް އާއި ފުލަމް ބައްދަލުކުރި މެޗު، ލިވަޕޫލުގެ ޑިއޮގޯ ޖޮޓާ ފަހުވަގުތު ކާމިޔާބުކޮށްދިން ލަނޑާއި އެކު 2-2 އިން އެއްވަރުވެގެން ނިމިއްޖެއެވެ.

ލިވަޕޫލްގެ ދަނޑުގައި ކުޅުނު މި މެޗުގައި ދެ ޓީމުގެ ފަރާތުން ވާދަވެރި އަދި ފޯރިގަދަ ކުޅުމެއް ފެނިގެންދިޔައެވެ.

މެޗު ފެށިގެން 11 ވަނަ މިނެޓުގައި އެންޑްރިއާސް ޕެރޭރާ ޖެހި ލަނޑުން ފުލަމް ލީޑުނެގިއެވެ. އޭގެ ހަ މިނެޓު ފަހުން ލިވަޕޫލްގެ އެންޑީ ރޮބާޓްސަންއަށް ރަތް ކާޑު ދެއްކުމާއެކު، ލިވަޕޫލް މެޗުގެ ބޮޑުބައި ކުޅެންޖެހުނީ އެއް ކުޅުންތެރިއަކު މަދުންނެވެ.

ނަމަވެސް މެޗުގެ ދެވަނަ ހާފުގެ ފެށުމާއި އެކު ކޯޑީ ގަކްޕޯ ޖެހި ލަނޑުން ލިވަޕޫލް މެޗު އެއްވަރުކުރިއެވެ. ނަމަވެސް 76 ވަނަ މިނެޓުގައި ރޮޑްރިގޯ މުނީޒް ޖެހި ލަނޑުން ފުލަމް އަނެއްކާވެސް މެޗުގެ ލީޑު ނެގިއެވެ. މެޗުން ލިވަޕޫލް ބަލިވާން ދަނިކޮށް މެޗު އެއްވަރުކޮށް، ބަލިވުމުން ސަލާމަތް ކޮށްދިން ލަނޑު ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޑިއޮގޯ ޖޮޓާ ޖަހާފައި ވަނީ މެޗުގެ 88 ވަނަ މިނިޓުގައެވެ.

މި ނަތީޖާއާއެކު ލިވަޕޫލް މިވަނީ ޖެހިޖެހިގެން ދެވަނަ މެޗަކުން އެއްވަރުވެފައެވެ. އެ ޓީމު މިހާރު އެއްވަނައިގައި އޮތީ 36 ޕޮއިންޓާއެކުއެވެ. އަދި ފުލަމް އުޅެނީ 24 ޕޮއިންޓާއެކު ތާވަލްގެ ނުވަ ވަނައިގައެވެ. އަނެއްކޮޅުން ތާވަލުގެ ދެވަނާގައި މިވަގުތު އޮތް ޗެލްސީ މިހަފުތާގައި ކުޅޭ މެޗުން މޮޅުވެއްޖެ ނަމަ ލިވަޕޫލާއި ޕޮއިންޓުގެ ގޮތުން ދެ ޕޮއިންޓަށް ގާތްވެގެންދާނެއެވެ.

އިނގިރޭސި ޕްރިމިއަރ ލީގު ލިވަޕޫލް