ރާއްޖޭގައި ވޭޕް އެތެރެކުރުމާއި ބޭނުންކުރުން އަދި ވިއްކުން މަނާކުރުމަށް ދުންފަތް ކޮންޓްރޯލް ކުރުމުގެ ގާނޫނަށް ގެނައި އިސްލާހާއެކު މިރޭ 12 އިން ފެށިގެން ވޭޕް ބޭނުންކުރުމާއި ވިއްކުމާއި ބެހުން މަނާވާނެއެވެ.
މި އިސްލާހުގެ ދަށުން ވޭޕް ކުރުމަށް ބޭނުންކުރާ އާލާތްތައް އެތެރެކޮށްފިނަމަ 50،000 ރުފިޔާއިން ޖޫރިމަނާކުރެވޭނެއެވެ. އަދި އެތެރެކުރާ ކޮންމެ އާލާތަކަށް 10،000 ރުފިޔާގެ މަގުން އިތުރަށް ޖޫރިމަނާކުރެވޭނެއެވެ. ވޭޕް ވިއްކައިފިނަމަ 20،000 ރުފިޔާއިން ޖޫރިމަނާކުރުމާއެކު، ވިއްކި ކޮންމެ ވޭޕަކަށް 10،000 ރުފިޔާގެ ޖޫރިމަނާއެއްވެސް ކުރެވޭނެއެވެ.
މި ގާނޫނުގެ ދަށުން ދުންފަތުގެ ބާވަތްތައް ވިއްކޭނެ އެންމެ ހަގު އުމުރު 18 އަހަރުން 21 އަހަރަށް މަތިކޮށްފައިވެއެވެ. އަދި މަނާ ތަންތަނުގައި ދުންފަތުގެ އިސްތިއުމާލުކޮށްފިނަމަ ހަރުކަށި ފިޔަވަޅު އެޅުމަށްވެސް ހިމަނާފައިވެއެވެ.
ފާހަގަކޮށްލެވޭ ކަމަކީ މިއީ 2010 ގައި އަމަލުކުރަން ފެށި ދުންފަތް ކޮންޓްރޯލް ކުރުމުގެ ގާނޫނަށް 14 އަހަރުގެ ތެރޭގައި ގެނެވުނު ފުރަތަމަ އިސްލާހެވެ.
މީގެއިތުރުން، ސަރުކާރުން ވަނީ ދުންފަތުގެ ބާވަތްތަކުން ނަގާ ޑިއުޓީވެސް ބޮޑުތަނުން އިތުރުކޮށްފައެވެ. މިހާރު 100 ރުފިޔާއަށް ގަންނަން ލިބޭ ސިނގިރޭޓު ފޮއްޓެއްގެ އަގު 230 ރުފިޔާއަށްވުރެ މައްޗަށް ގޮސްފައިވެއެވެ.
ކޮމެންޓް