ދަރަނި އަދާ ކުރާއިރު އެންމެ ނާޒުކު ފަރާތްތައް ރައްކާތެރި ކުރަން ޖެހޭ: ޒަމީރު

ދަރަނި ބޮޑުވުމުގެ ސަބަބުން ކުރިމަތިވާ ހިރާސްތަކުން އެންމެ ނާޒުކު ހާލަތުގައި ދިރިއުޅޭ ފަރާތްތައް ރައްކާތެރި ކުރަން ޖެހޭ ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.

ވަޒީރު މިހެން ވިދާޅުވީ، އިންޑިއާގެ ނިއުދިއްލީގައި ބޭއްވި ގްލޯބަލް އިކޮނޮމިކް ފޯރަމް 2024 ގައި ވާހަކަފުޅުދައްކަވަމުންނެވެ.

ދުނިޔޭގެ އިޤްތިޞާދު ކުރިމަތިލާންޖެހިފައިވާ ގޮންޖެހުންތަކަށް އަލިއަޅުއްވާލައްވަމުން ވަޒީރު ވިދާޅުވީ، ރަޝިއާ-ޔޫކްރެއިން ހަނގުރާމާއި މެދުއިރުމަތީގައި ހިނގަމުންދާ ކަންކަމުގެ ސަބަބުން ދުނިޔޭގެ ވިޔަފާރި އަދި އިޤްތިޞާދަށް ބޮޑެތި ބަދަލުތަކެއް އައިސްފައިވާ ކަމަށެވެ. އަދި ތެލާއި ކާބޯތަކެތީގެ އަގު އުފުލިފައިވުމުގެ ސަބަބުން ރާއްޖެއަށްވެސް މާލީ ގޮތުން ގޮންޖެހުންތަކާއި ކުރިމަތިލާންޖެހިފައިވާ ކަމަށް ވިދާޅުވިއެވެ.

ކޯވިޑުގެ ޢާލަމީވަބާގެ ސަބަބުން ބޮޑެތި އަދަދުން ދަރަނިތައް ނަގަން ޤައުމުތަކަށް މަޖުބޫރުވިކަން ފާހަގަކުރައްވާ ވަޒީރު ވިދާޅުވީ، މިހާރު އެދަރަނިތައް ދެމެހެއްޓެނިވި ގޮތެއްގައި ދެއްކުމަށް ގޮންޖެހުންތައް ހުރި ކަމަށެވެ. ނަމަވެސް މިކަމުން އަރައިގަތުމަށް މަސައްކަތް ކުރާއިރު މާލީ ހަރުދަނާކަން ދަމަހައްޓާ ސިޔާސީ އަދި އިސްތިރާޖީ ހަޤީޤަތައް މަސައްކަތްތައް ބައްޓަން ކުރަން ޖެހޭ ކަމަށް ވިދާޅުވިއެވެ.

ރާއްޖެއަކީ މޫސުމީ ބަދަލުތަކުގެ ބޮޑެތި ހިރާސްތަކާއި ކުރިމަތިލާންޖެހިފައިވާ ޤައުމެއް ކަމަށް ވިދާޅުވަމުން، ރާއްޖޭގައި ބޭނުން ކުރާ ހަކަތައިގެ 33 އިންސައްތަ އިޔާދަ ކުރަނިވި ހަކަތައަށް ބަދަލު ކުރުމަށް މަސައްކަތް ކުރަމުންދާކަން މާލީ ވަޒީރު ފާހަގަކުރެއްވިއެވެ. އަދި މިފަދަ ލަނޑުދަނޑިތައް ހާސިލްކުރުމަށް ގުޅިގެން މަސައްކަތް ކުރަންޖެހޭކަމަށާއި، ޤައުމުތަކުން މާލީ އެހީތެރިކަމުގެ އިތުރަށް ފަންނީ އެހީތެރިކަން ފޯރުކޮށްދިނުން މުހިންމުކަމަށް ވަޒީރު ވިދާޅުވިއެވެ.