ހުޅުމާލޭގައި ޓެކްސީ ޑްރައިވަރުން ކުރި އިހުތިޖާޖާ ގުޅިގެން ފުލުހުންގެ ބެލުމުގެ ދަށަށް ގެނެވުނު ތިން މީހުންގެ ތެރެއިން ދެމީހަކު ބަންދުކޮށް، އެކަކު ޝަރުތުތަކާއެކު ދޫކޮށްލައިފިއެވެ.
ބުދަ ދުވަހުގެ ރޭ ސަރުކާރުން ޓެކްސީގެ ޚިދުމަތް ފެށުމާ ގުޅިގެން ޓެކްސީ ޑްރައިވަރުން ކުރި އިހުތިޖާޖުގައި، ހުޅުމާލެ ފަޅިން ބްރިޖަށް އަރާ ހަލިމަގު (ހައިވޭ) ބަންދުކޮށް، އާންމު ދަތުރުފަތުރަށް ދަތިވާގޮތަށް ޢަމަލުތަކެއް ހިންގާފައިވެއެވެ.
މި ހާދިސާއާ ގުޅިގެން ފުލުހުން ވަނީ ތިން މީހަކު ހައްޔަރުކޮށް، 22 އުޅަނދު ޓޯކޮށްފައެވެ. ހައްޔަރުކުރެވުނު މީހުންނަކީ މުޙައްމަދު ޝާމިން، އަޙްމަދު ޝަބީން އަދި ނޫމާން އަޙްމަދެވެ.
ކޯޓަށް ހާޒިރުކުރުމުން މުޙައްމަދު ޝާމިން އާއި އަޙްމަދު ޝަބީން 5 ދުވަހަށް ބަންދުކުރުމަށް އަމުރުކޮށްފައިވާއިރު، ނޫމާން އަޙްމަދު ވަނީ ޝަރުތުތަކާއެކު ދޫކޮށްލާފައެވެ.
ފުލުހުން ބުނާ ގޮތުގައި މި މައްސަލައިގެ ތަޙުޤީޤު މިހާރު ދަނީ ކުރިއަށެވެ. އިހުތިޖާޖުގެ ސަބަބުން ހުޅުމާލޭގެ މަގުތައް ބަންދުވެ، އާންމު ދަތުރުފަތުރަށް ބޮޑެތި ދަތިތަކާ ކުރިމަތިވެފައިވެއެވެ.
ކޮމެންޓް