މަސްވެރިންގެ ދަފްތަރުން ޒުވާނުން މަސްވެރިކަމަށް ނުކުތުމަށް މަގުފަހިވާނެ: ވަޒީރު ޝިޔާމް

ސަރުކާރުން މިހާރު އެކުލަވާލަމުންދާ މަސްވެރިންގެ ދަފްތަރުގެ ސަބަބުން ޒުވާނުން މަސްވެރިކަމުގެ ސިނާޢަތަށް ނުކުތުމަށް މަގުފަހިވާނެކަމަށް މަސްވެރިކަމާއި ކަނޑުގެ ވަޞީލަތްތަކާބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.

ވަޒީރު މިހެން ވިދާޅުވީ މިއަހަރުގެ މަސްވެރިންގެ ދުވަހާ ގުޅުވައިގެން ވުޒާރާއިން ބޭއްވި "މަސްވެރިންގެ ގުންޒަރު"ގެ ތެރެއިން ބޭއްވި ޕެނަލް ޑިސްކަޝަންގައި ވާހަކަފުޅުދައްކަވަމުންނެވެ. މި ޕެނަލްގައި މަސްވެރިންގެ ދަފްތަރުން ލިބޭނެ ފައިދާތަކާ ގުޅޭގޮތުން މަސްވެރިއަކު ކުރި ސުވާލަކަށް ޖަވާބުދެއްވަމުންނެވެ.

ވަޒީރު ޝިޔާމް ވިދާޅުވީ މަސްވެރިންގެ ދަފްތަރު އެކުލަވާލުމުގެ މަސައްކަތުން، މަސްވެރިކަމުގެ ދާއިރާގައި ދިވެހިން މަދުކަން ފާހަގަކުރެވިފައިވާ ކަމަށެވެ. އެހެންކަމުން މި ސިނާޢަތަށް ދިވެހިންގެ މެދުގައި ޝައުޤު އުފައްދާ، ޒުވާން މަސްވެރިން ސިނާޢަތަށް ނެރުމަށް މަސައްކަތްތަކެއް ކުރަންޖެހޭކަން ވަޒީރު ފާހަގަކުރެއްވިއެވެ.

ގިނަ ޒުވާނުން މަސްވެރިކަމުގެ ސިނާޢަތަށް ނުނިކުންނަ އެއް ސަބަބަކީ ބޭންކުތަކުގެ ލުއި ލޯން ސްކީމްތައް މަސްވެރިންނަށް ނުލިބުން ކަމަށް ވަޒީރު ވިދާޅުވިއެވެ. މަސްވެރިންގެ ދަފްތަރު އެކުލަވާލުމުން މި މައްސަލައަށް ހައްލު ލިބި، ޒުވާނުން މަސްވެރިކަމަށް ނުކުންނާނެ ކަމަށް ވަޒީރު ވިދާޅުވިއެވެ.

މިހާރު ސަރުކާރުން އެކުލަވާލަމުންދާ މަސްވެރިންގެ ދަފްތަރުގައި މަސްވެރިކަމުގެ ލައިސަންސް ދޫކޮށްފައިވާ އުޅަނދުތަކުގެ 90 އިންސައްތަ ހިމެނިފައިވާ ކަމަށް ވަޒީރު ވިދާޅުވިއެވެ. އަދި މި ދަފްތަރަކީ މަސްވެރިންނަށް އިޖުތިމާޢީ ރައްކާތެރިކަން ކަށަވަރުކޮށްދޭނެ ދަފްތަރެއް ކަމަށްވެސް ވިދާޅުވިއެވެ.

"މަސްވެރިންގެ ގުންޒަރު" ކުރިއަށްދަނީ މި މަހުގެ 11 ވަނަ ދުވަހުން 13 ވަނަ ދުވަހާ ހަމައަށެވެ. މި ގުންޒަރުގައި 22 ރަށުން 43 މަސްވެރިންނާއި 8 މަސް ޕްރޮސެސްކުރާ ކުންފުނި ބައިވެރިވެއެވެ. މިއަހަރުގެ މަސްވެރިންގެ ދުވަހުގެ ރަސްމީ ޖަލްސާ އޮންނާނީ އަންނަ ހުކުރު ދުވަހުގެ ރޭ ދަރުބާރުގޭގައެވެ.