ޗައިނާ އާއި ރާއްޖެއާ ދެމެދު އަންނަ މަހު ސީދާ ދަތުރުތައް ފަށަނީ

ރާއްޖޭގެ ގައުމީ އެއާލައިން، މޯލްޑިވިއަނުން ރާއްޖެ އާއި ޗައިނާއާ ދެމެދު ސީދާ ދަތުރުތައް އަންނަ މަހުން ފަށައިގެން ކުރުމަށް ނިންމައިފި އެވެ.

މޯލްޑިއަނަށް ވައިޑް-ބޮޑީ މަތިންދާބޯޓު ގެނެސް، ދުނިޔޭގެ އެކި މަންޒިލުތަކަށް ދަތުރުތައް ފެށުމަކީ ރައީސް ޑރ. މުއިއްޒުގެ ރިޔާސީ ވައުދެވެ.

ޓްރާންސްޕޯޓު މިނިސްޓަރު މުޙައްމަދު އަމީން ޓްވީޓާގައި މިރޭ ކުރެއްވި ޕޯސްޓެއްގައި ވިދާޅުވިގޮތުގައި ރާއްޖެއާއި ޗައިނާގެ މެދުގައި ވައިގެ މަގުން ސީދާ ދަތުރުތައް ފެށުމުގެ ރަސްމިއްޔާތު މިއަދު ބެއިޖިންގައި ބާއްވާފައިވާ ކަމަށެވެ.

މި ރަސްމިއްޔާތުގައި މިނިސްޓަރު އަމީނާއި މޯލްޑިވިއަންގެ އިސްވެރިން އަދި ދެ ގައުމުގެ ކަމާބެހޭ ފަރާތްތަކުން ބައިވެރިވި އެވެ.

މިނިސްޓަރު އަމީން ވަނީ މޯލްޑިވިއަން މެދުވެރިކޮށް ވައިޑް ބޮޑީ އެއާ ކްރާފްޓުގެ ދަތުރުތައް ފެށުމަށް ރައީސް މުއިއްޒު ދެއްވި ޔަގީންކަން ހަގީތަކަށް ހަދައިދިން ކަމަށް ޓަކައި އެމަނިކުފާނަށް ޝުކުރު އަދާކުރައްވާފަ އެވެ.

އަމީން އިތުރަށް ވިދާޅުވީ އަންނަ ޖެނުއަރީން ފަށައިގެން ބެއިޖިން، ޝަންހާއީ، ޗެންޑޫ އަދި ޝިއާނަށް މޯލްޑިވިއަންގެ ދަތުރުތައް ފަށާނެ ކަމަށާއި މި ދަތުރުތަކާ އެކު ރާއްޖޭގެ ޓޫރިޒަމް ސިނާއަތަށް ބޮޑު ކުރިއެރުމެއް ލިބޭނެ ކަމަށެވެ.

ވައިޑް ބޮޑީ އެއާކްރާފްޓް ތަކަކީ ގިނަ އަދަދެއްގެ ފަސިންޖަރުން އުފުލޭ ވަރުގެ ޖާގަ އޮންނަ ފުޅާ މަތިންދާބޯޓު ތަކެވެ.

މޯލްޑިވިއަން އަށް މިހާތަނަށް ވައިޑް ބޮޑީ އެއާކްރާފްޓެއް ގެނެސްފައެއް ނުވެ އެވެ.

ރާއްޖޭގައި އެންމެ ގިނަ އެއާޕޯޓް ތަކަށް ދަތުރު ކުރާ މޯލްޑިވިއަނުން މި ވަގުތު ދަތުރު ކުރަނީ ރާއްޖޭގެ 16 މަންޒިލަކަށާއި ސްރީލަންކާ، ބަންގްލަދޭޝް އަދި އިންޑިއާގެ ތިން ސަރަހައްދަކަށެވެ.