ފުވައްމުލަކުގައި ޑުރަގު ވިޔަފާރިކޮށް މަނީލޯޑާ ކުރާ ބޮޑުންގެ ދެމީހަކު ހައްޔަރަށް

ޏ. ފުވައްމުލަށް ސިޓީގައި މަސްތުވާތަކެތީގެ ވިޔަފާރިކޮށް މަނީ ލޯންޑާ ކުރުމުގައި އިސްކޮށް ހަރަކާތްތެރިވާ ކަމަށް ތުހުމަތު ކުރެވޭ ދެ މީހަކު ހައްޔަރުކޮށްފައިވާ ކަމަށް ފުލުހުން ބުނެފި އެވެ.

މި ދެ މީހުން އަތުލައިގަތީ ޑުރަގާ ދެކޮޅަށް ފުލުހުންގެ ހިންގާ "އޮޕަރޭޝަން ވެށި ރައްކަލް" ގެ ދަށުން، ފުވައްމުލަކުގައި މިހާރު ކުރިއަށް ގެންދާ އޮޕަރޭޝަންގައި ކަމަށް އެ އިދާރާއިން ބުންޏެވެ.

ފުލުހުން ބުނީ އެތަނުގެ އިންޓެލިޖެންސް އަދި ތަހުގީގަށް ލިބިފައިވާ މައުލޫމާތުގެ އަލީގައި، މި ޑިސެމްބަރު މަހުގެ ނުވަ ވަނަ ދުވަހު ހައްޔަރުކޮށްފައި ވަނީ ޏ. ފުވައްމުލަކު ދޫޑިގަން، ކަރަންކާވިލާ، އަހުމަދު ނިއުޝާދު، 34، އާއި ހަމަ އެވަށު، ޒަމާނީގެ، ހަސަން އާޒިމް، 29، ކަމަށެވެ.

ޖެނުއަރީން ފަށައިގެން ކުރިއަށް ގެންދާ "އޮޕަރޭޝަން ވެށި ރައްކަލް" ގެ ތެރެއިން މިހާތަނަށް 4،048 ތަން ބަލައި ފާސްކޮށް، 1،147 މީހުން ހުއްޓުވާފައިވާ ކަމަށް ފުލުހުން ބުންޏެވެ.

މީގެ އިތުރުން 58 މީހަކު ހައްޔަރުކޮށް، ހައްޔަރު ކުރި މީހުންގެ މައްޗަށް ތުހުމަތު ކުރެވޭ ޖުމުލަ 75 މައްސަލައެއް ތަހުގީގުކޮށް، އޭގެ ތެރެއިން 65 މައްސަލައެއްގެ ތަހުގީގު ނިންމައި ޕްރޮސިކިއުޓާ ޖެނެރަލްގެ އޮފީހަށް ވަނީ ފޮނުވާފައި ކަމަށް ފުލުހުން ބުނެއެވެ.

ތަހުގީގަށް ހޯދިފައިވާ ގޮތުގައި، މިދިޔަ ފަސް އަހަރު ތެރޭގައި އަހުމަދު ނިއުޝާދުގެ ބޭންކު އެކައުންޓް މެދުވެރިކޮށް 21 މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައި ކަމަށާއި އަދި ފާއިތުވި ދެ އަހަރު ތެރޭގައި ހަސަން އާޒިމްގެ ބޭންކު އެކައުންޓް މެދުވެރިކޮށް ހަތް މިލިއަނަށްވުރެ ގިނަ ރުފިޔާގެ މުއާމަލާތް ހިންގާފައިވާކަން ފާހަގަކުރެވިފައިވާ ކަމަށް ވެސް ފުލުހުން ބުންޏެވެ.

މި މައްސަލައާ ގުޅިގެން 21 މީހަކާއި ދެ ކުންފުންޏެއްގެ އެކައުންޓް ކޯޓު އަމުރުގެ ދަށުން ވަނީ ހިފަހައްޓާފަ އެވެ. އަދި އެ ފަރާތް ތަކުގެ މައްޗަށް ތުހުމަތު ކުރެވޭ މަނީ ލޯންޑަރިންގެ މައްސަލަ ފުލުހުންގެ މިހާރު އަންނަނީ ތަހުގީގު ކުރަމުންނެވެ.