އއ. އުކުޅަހު މެޖިސްޓްރޭޓް ކޯޓުގެ އިސް މެޖިސްޓްރޭޓް ސަސްޕެންޑްކޮށްފި
އިސް މެޖިސްޓްރޭޓް އަހުމަދު މުއާވިޔަތު ގާސިމް
ޖުޑީޝަލް ސާވިސް ކޮމިޝަން (ޖޭއެސްސީ) އިން އއ. އުކުޅަހު މެޖިސްޓްރޭޓް ކޯޓުގެ އިސް މެޖިސްޓްރޭޓް އަހުމަދު މުއާވިޔަތު ގާސިމް ސަސްޕެންޑްކޮށްފި އެވެ.
ޖޭއެސްސީން މަޢުލޫމާތު ދީފައިވާ ގޮތުގައި އެ މެޖިސްޓްރޭޓް ސަސްޕެންޑްކުރީ 28 ނޮވެމްބަރުގައެވެ.
ޖޭއެސްސީގެ ވެބްސައިޓުގައި ބަޔާންކޮށްފައިވާ ގޮތުން މެޖިސްޓްރޭޓް ސަސްޕެންޑް ކުރުމަށް ނިންމީ ތަހުގީގަށް ހުށަހަޅާފައިވާ ހެކިތަކަށް ރިއާޔަތްކޮށް، މަގާމުގައި ދެމިހުރެއްޖެ ނަމަ މައްސަލަ ތަހުގީގު ކުރުމަށް އެޅިދާނެ ހުރަހަކަށް ބަލައިގެންނެވެ. އަދި މި ސަސްޕެންޝަން ދެމިއޮންނާނީ މައްސަލަ ބަލައި ނިމެންދެން ކަމަށް ޖޭއެސްސީން ބުނެފައިވެ އެވެ.
ނަމަވެސް، މި ސަސްޕެންޝަނަކީ މުސާރަ ލިބޭ ގޮތަށް ކުރި ސަސްޕެންޝަނެއްކަން ނުވަތަ ނޫންކަން ޖޭއެސްސީން ހާމަކޮށްފައެއް ނުވެ އެވެ. އަދި މިހާރު ޖޭއެސްސީން ގެންގުޅޭ އުސޫލަކީ މައްސަލައެއް ފަނޑިޔާރެއްގެ މައްޗަށް ސާބިތުވާ ހާލަތުގައި މެނުވީ ތުހުމަތު ކުރެވޭ މައްސަލައިގެ ތަފުސީލުތައް ހާމަނުކުރުން ކަމަށްވާތީ، މި މައްސަލައިގެ އިތުރު ތަފުސީލެއް ލިބިފައެއް ނުވެ އެވެ.
ކޮމެންޓް