ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ ކުނި އުކާލުމުގެ މަސައްކަތް ވޭސްޓް މެނޭޖުމަންޓް ކޯޕަރޭޝަން (ވެމްކޯ)އާ ހަވާލުކުރުމަށް ފިނޭންސް މިނިސްޓްރީން އެމްއޭސީއެލްއަށް އަންގައިފިއެވެ.
މި އެންގުން މި ގޮތަށް އަންގާފައި މިވަނީ އެމްއޭސީއެލްއިން އަމިއްލަ ފަރާތަކާ އެ މަސައްކަތް ހަވާލުކުރުމަށްފަހުގައެވެ.
މިދިޔަ އޮކްޓޯބަރު މަހުގެ 15 ގައި އެމްއޭސީއެލްއިން ވަނީ ދުވާލަކު 250،000 ރުފިޔާގެ ރޭޓުން ކުނި އުކާލުމުގެ މަސައްކަތް އައި އެންޑް ސީ ޓްރޭޑިން ޕްރައިވެޓް ލިމިޓެޑާ ހަވާލުކޮށްފައެވެ. މިގޮތަށް އަމިއްލަ ފަރާތަކާ މަސައްކަތް ހަވާލުކުރީ ވެމްކޯއިން ކުނި އުކާލުމުގެ އަގު ބޮޑުކުރުމާ ގުޅިގެންނެވެ.
ފިނޭންސް މިނިސްޓްރީގެ ސްޓޭޓް މިނިސްޓަރު ހުސެއިން ޝާމް އާދަމް ސޮއިކުރައްވައި ފޮނުއްވި ސިޓީއެއްގައި ވަނީ އަމިއްލަ ފަރާތާއެކު ވެފައިވާ އެއްބަސްވުން ބާތިލްކުރުމަށް އަންގަވާފައެވެ. އެ ސިޓީގައި ބުނެފައިވަނީ އިކޮނޮމިކް ކައުންސިލްގެ ނިންމުމާ އެއްގޮތަށް ޓަނަކަށް 2،660 ރުފިޔާގެ ރޭޓުން ވެމްކޯއާ މަސައްކަތް ހަވާލުކުރުމަށެވެ.
މި އެންގުމާ ގުޅިގެން އަމިއްލަ ފަރާތަކާ އެކު އެމްއޭސީއެލްއިން ހެދި ކުނި އުކާލުމުގެ އެއްބަސްވުން މިހާރު ބާތިލްކޮށްފައިވާކަން އެނގިފައިވެއެވެ.
ކޮމެންޓް