ކުޑަކުދިން ބޭނުންކޮށްގެން މަސްތުވާތަކެތީގެ ވިޔަފާރިކުރުން ވަކި ބާވަތެއްގެ ކުށެއްގެ ގޮތުގައި ގާނޫނުގައި ކަނޑައެޅިފައި އޮންނަން ޖެހޭކަމަށް މަނަދޫ ދާއިރާގެ މެންބަރު ހުސްނީ މުބާރިކް ވިދާޅުވެއްޖެއެވެ.
މެމްބަރު ހުސްނީ މިފަދައިން ވިދާޅުވެފައި ވަނީ މަސްތުވާތަކެއްޗާ ބެހޭ ގާނޫނަށް ހުށަހަޅާފައިވާ އިސްލާހަށް މިއަދުގެ މަޖިލިސް ޖަލްސާގައި ވާހަކަފުޅު ދައްކަވަމުންނެވެ.
މެންބަރު ހުސްނީ ވިދާޅުވީ ގާނޫނުގައި އޮތް ބާގަނޑެއްގެ ސަބަބުން މަސްތުވާތަކެއްޗާ ދެކޮޅަށް ކުރަމުންދާ މަސައްކަތްތަކަށް ހުރަސްތަކަކާ ކުރިމަތިވެފައިވާ ކަމަށެވެ. އަދި ރާއްޖޭގައި މަސްތުވާތަކެއްޗާ ދެކޮޅަށް އެންމެ ބޮޑު ހުރަހަކަށް ވެފައިވަނީ ކުޑަކުދިން ބޭނުންކޮށްގެން މަސްތުވާތަކެތީގެ ވިޔަފާރި ކުރުން ކަމަށް ފާހަގަކުރެއްވިއެވެ.
ގާނޫނަށް މިހާރު ހުށަހެޅިފައިވާ އިސްލާހުތަކަކީ މިހާރު ހުރި ހުރަސްތައް ނައްތާލުމަށް މަގުފަހިވެގެންދާނެ ކަމެއް ކަމަށް ހުސްނީ ވިދާޅުވިއެވެ. އެގޮތުން، އަލަށް ބޭނުންކުރަމުންދާ މަސްތުވާތަކެތީގެ ބާވަތްތަކާއި، މަސްތުވާތަކެތި އުފެއްދުމަށް ބޭނުންކުރެވިދާނެ އާލާތްތައް ވަކި ޖަދުވަލުތަކެއްގައި ހިމަނާފައިވާކަން އޭނާ ފާހަގަ ކުރެއްވިއެވެ.
މެންބަރު ހުސްނީ ވިދާޅުވީ ބިލު ފާސްކުރެވިގެންދާއިރު، ކޮމިޓީ މަރުހަލާގައި މިހާރު ކުރިމަތިވެފައިވާ ގޮންޖެހުންތަކަށް ހައްލު ލިބޭފަދަ ގޮތަކަށް މި ގާނޫނު ބައްޓަން ކުރެވިގެންދާނެ ކަމަށް ގަބޫލު ކުރައްވާ ކަމަށެވެ.
ކޮމެންޓް