އިންތިޚާބުތަކާ ދިމާކޮށް ނިމިދިޔަ ސަރުކާރުން 1905 ކުށްވެރިން މިނިވަންކުރި: ރައީސް

ނިމިދިޔަ ސަރުކާރުން އެތައް ކުށްވެރިންނެއް ވަނީ މިނިވަންކޮށްފައި

އެކިއެކި އިންތިޚާބުތަކާ ދިމާކޮށް 1905 ކުށްވެރިން މިދިޔަ ސަރުކާރުން މިނިވަންކުރިކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އއ. ތޮއްޑޫގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރައީސް ވިދާޅުވީ މިދިޔަ ސަރުކާރުގައި ކޮންމެ އިންތިޚާބަކާ ދިމާކޮށް އެތައް ސަތޭކަ ކުށްވެރިންނެއް ދޫކުރިކަމަށެވެ. އެގޮތުން މިދިޔަ ސަރުކާރުގައި ގައިދީން މިނިވަންކޮށްފައިވަނީ ގައުމާ މެދު ވިސްނާލުމެއް ނެތިކަމަށް ރައީސް ވިދާޅުވިއެވެ. އަދި މިކަމުގެ ސަބަބުން ވަރަށް ގިނަ އެކި ކަހަލަ ނުރައްކާތެރި ކަންތައްތަކާއި އަނިޔާވެރި ކަންކަން މަގުމަތީގައި ހިނގާ، ހަމަނުޖެހުން އުފެދިފައިވާކަމަށްވެސް ރައީސް ފާހަގަކުރެއްވިއެވެ.

ރައީސް ވިދާޅުވީ އެ މަނިކުފާނުގެ ވެރިކަމުގައި ކްލެމެންސީއާއި އަދި ރައީސަށް ލިބިދީފައިވާ ބާރުގެ ތެރެއިން އަދަބު ލުއިކޮށްދީގެން މާފުދީ މިނިވަންކޮށްފައިވާނީ 86 ކުށްވެރިން ކަމަށެވެ. އަދި މި ސަރުކާރުން އިންތިޚާބުތަކާ ދިމާކޮށް ސިޔާސީ ވިސްނުމެއްގައި އެއްވެސް ބަޔަކު ޖަލުން ދޫކޮށްލާފައިނުވާނެ ކަމަށްވެސް ރައީސް ވިދާޅުވިއެވެ.

ރައީސް ވިދާޅުވީ ސަރުކާރުން ބޭނުންވަނީ މުޖުތަމަޢުއަށް ހަމަޖެހުން ގެންނަންކަމަށެވެ. އެހެންކަމުން ސިޔާސީ ވިސްނުމެއްގައި ބަދަލު ހިފުމުގެ ރޫހުގައި އެއްވެސް ކަމެއް ނުކުރައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ޑރ މުޙައްމަދު މުޢިއްޒު