ޕާކިސްތާނުގެ ކުރީގެ ބޮޑުވަޒީރުގެ އަނބިކަނބަލުން ހައްޔަރުކުރުމަށް ކޯޓުން އަމުރުކޮށްފި

ޕާކިސްތާނުގެ ކުރީގެ ބޮޑުވަޒީރު އިމްރާން ޚާންގެ އަނބިކަނބަލުން ބުޝްރާ ބީބީ ހައްޔަރުކުރުމުގެ އަމުރެއް އެ ގައުމުގެ ކޯޓަކުން ނެރެފިއެވެ.

ޕާކިސްތާނުގެ މީޑިއާތަކުން ބުނާ ގޮތުގައި މި އަމުރު ނެރެފައިވަނީ ޚިޔާނާތުގެ މައްސަލައެއްގެ އަޑުއެހުންތަކަށް ތަކުރާރުކޮށް ހާޒިރުނުވުމުގެ ސަބަބުންނެވެ.

ބުޝްރާ ބީބީ ވަނީ މިދިޔަ އަހަރުގެ ޖެނުއަރީ މަހުން ފެށިގެން އޮކްޓޯބަރު މަހާ ހަމައަށް ޖަލުގައި ހުރުމަށްފަހު ކަފާލާތުގެ ދަށުން ދޫކޮށްލާފައެވެ. އޭނާ ޖަލަށްލާފައިވަނީ 2018 އިން 2022 އަށް އިމްރާންގެ ވެރިކަމުގައި އޭނާގެ ސަރުކާރަށް ލިބުނު ހަދިޔާތައް ގަވާއިދާ ޚިލާފަށް ވިއްކުމާ ގުޅޭ މައްސަލައެއްގައެވެ.

އިމްރާން ޚާން މިހާރު ވަނީ މިދިޔަ އަހަރުގެ އޮގަސްޓް މަހުން ފެށިގެން ޖަލުގައި ބަންދުކޮށްފައެވެ. އޭނާގެ މައްޗަށް ވަނީ ހަތަރު މައްސަލައެއް ސާބިތުވެފައެވެ. އޭގެ ތެރެއިން ދެ މައްސަލަ ބާތިލުކޮށްފައިވާއިރު، އޭގެ ތެރޭގައި ދައުލަތުގެ ހަދިޔާތަކާ ގުޅޭ މައްސަލަވެސް ހިމެނެއެވެ.

ބުރާސްފަތި ދުވަހު ނެރުނު ހައްޔަރުކުރުމުގެ އަމުރުގެ އިތުރުން، ބުޝްރާ ޚާންގެ ގެރެންޓީ ދޭ ފަރާތަށް ވެސް ކޯޓުން ވަނީ ނޯޓިސް ފޮނުވާފައެވެ. މިކަމާ ގުޅިގެން އިމްރާންގެ ޕާކިސްތާން ތަހްރީކް އިންސާފް ޕާޓީ (ޕީޓީއައި) އިން އަންނަނީ އޭނާ މިނިވަންކުރުމަށް ގޮވާލަމުންނެވެ.

ޕާކިސްތާނުގެ ސިޔާސީ މަޝްރަހު ދިރާސާކުރާ ބައެއް ފަރާތްތަކުންނާއި ޕީޓީއައިއިން ބުނާ ގޮތުގައި، އިމްރާންގެ މައްޗަށް ކޮށްފައިވާ ދައުވާތަކަކީ ސިޔާސީ ގޮތުން ކޮށްފައިވާ ދައުވާތަކެކެވެ. އިމްރާނަކީ މިހާރުގެ ބޮޑު ވަޒީރު ޝެހްބާޒް ޝަރީފާ އިދިކޮޅުގައި އެންމެ ވާދަވެރި ފަރާތް ކަމަށްވެސް ބެލެވެއެވެ.