ދުންފަތް ކޮންޓްރޯލްކުރާ ކައުންސިލްތަކަށް ސަރުކާރުން ހާއްސަ އެހީތެރިކަމެއް ފޯރުކޮށްދެނީ

ދުންފަތް ކޮންޓްރޯލްކޮށް އެ ނުރައްކަލުން ސަލާމަތްވުމަށް އެންމެ ރަނގަޅު މަސައްކަތެއް ކުރާ ކައުންސިލްތައް ފާހަގަކޮށް، އެ ކައުންސިލްތަކުގެ ތަރައްގީގެ މަޝްރޫއުތަކަށް ސަރުކާރުން ހާއްސަ އެހީތެރިކަމެއް ފޯރުކޮށްދޭން ނިންމާފައިވާ ކަމަށް ހެލްތު މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.

ދުންފަތާ ދެކޮޅަށް ސަރުކާރުން އަޅަމުން އަންނަ ފިޔަވަޅުތަކާ ބެހޭ ގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރު ނާޒިމް ވިދާޅުވީ، މުޖުތަމައުގެ ބައިވެރިވުން އިތުރުކުރުމަށްޓަކައި ކައުންސިލްތަކުން އިސްނަގައިގެން ރަށު ފެންވަރުގަޔާއި އަތޮޅު ފެންވަރުގައި ހިންގާ ދުންފަތް ކޮންޓްރޯލް ކުރުމުގެ މަސައްކަތަށް ސަރުކާރުން ނިޒާމްގެ ތެރެއިން އެހީތެރިވަމުން ގެންދާނެ ކަމަށެވެ.

މީގެ އިތުރުން، އެންމެ ރަނގަޅު މަސައްކަތްތަކެއް ކުރާ ކައުންސިލްތަކަކަށް އެ އިދާރާއިން ހިންގާ ތަރައްގީގެ މަޝްރޫއުތަކަށް ސަރުކާރުން ހާއްސަ އެހީތެރިކަން ފޯރުކޮށްދިނުމުގެ ނިޒާމެއް، ދުންފަތް ކޮންޓްރޯލްކުރުމުގެ ދުރު ރާސްތާ ޕްލޭންގެ ތެރެއިން ފަހިކޮށްދޭނެ ކަމަށްވެސް މިނިސްޓަރު ނާޒިމް ވިދާޅުވިއެވެ.

ދުންފަތުގެ އިސްތިއުމާލުކުރުން ހުއްޓާލަން ބޭނުންވާ ފަރާތްތަކަށް ބޭނުންވާ ސެޒޭޝަން ހިދުމަތް މުޅި ރާއްޖޭގައި ފަށަން ތައްޔާރުވަމުން އަންނަ ކަމަށް މިނިސްޓަރު ނާޒިމް ވިދާޅުވިއެވެ. މިގޮތުން، އެ ހިދުމަތަށް ބޭނުންވާ މީހުން ތަމްރީނު ކުރުމުގެ މަސައްކަތް މިހާރު ވަނީ ފަށާފައި ކަމަށާއި، ނިކޮޓިން ޕެޗާއި ގަމް އާސަންދައިން ލިބޭނެ އިންތިޒާމް ވަނީ ހަމަޖައްސާފައި ކަމަށް އޭނާ ވިދާޅުވިއެވެ.

މީގެ އިތުރުން، 24 ގަޑިއިރު ހިދުމަތް ލިބޭނެ ކުއިޓް ލައިނެއް (1676) ވަނީ ގާއިމްކޮށްފައި ކަމަށާއި، ދުންފަތް ކޮންޓްރޯލް ކުރުމަށް ފަސް އަހަރުގެ އެކްޝަން ޕްލޭނެއް އެކުލަވާލުމުގެ މަސައްކަތްވެސް ވަނީ ފަށާފައި ކަމަށް މިނިސްޓަރު ނާޒިމް ވިދާޅުވިއެވެ. އަދި 'ދަފަރާ'ގެ ނަމުގައި ދުންފަތާ ދެކޮޅު ކެމްޕޭނެއް ކުރިއަށް ގެންދާ ކަމަށާއި، މިހާތަނަށް މި ކެމްޕޭން ނ، ތ، ލ، އަދި ސ އަތޮޅުގައި ވަނީ ކުރިއަށް ގެންގޮސްފައި ކަމަށްވެސް އޭނާ ވިދާޅުވިއެވެ.