ލިވަޕޫލުގެ ތަރި ސަލާހު ޕީއެސްޖީއާއި ގުޅުމުގެ ފުރުސަތު ބޮޑު: ރިޕޯޓް

ލިވަޕޫލްގެ ތަރި މުހައްމަދު ސަލާހު ޕެރިސް ސެއިންޓް-ޖަރމެއިން (ޕީއެސްޖީ) އާ ގުޅުމުގެ ފުރުސަތު ބޮޑުވަމުންދާ ކަމަށް ފްރާންސްގެ މީޑިއާތަކުން ރިޕޯޓުކޮށްފިއެވެ.

އުމުރުން 32 އަހަރުގެ މިސްރު ކުޅުންތެރިޔާގެ ކޮންޓްރެކްޓް މި ސީޒަނުގެ ނިޔަލަށް ހަމަވާއިރު، ލިވަޕޫލުން އޭނާއަށް އާ އެއްބަސްވުމެއް ހުށަހަޅާފައި ނުވާ ކަމަށް އޭނާ ބުނެއެވެ.

ފްރާންސްގެ ނޫސް "ލެކުއިޕޭ" އިން ބުނެފައިވަނީ ޕީއެސްޖީން ސަލާހާއެކު ޓްރާންސްފާގެ މަޝްވަރާތައް ފަށާފައިވާ ކަމަށެވެ. އަދި ޕީއެސްޖީގެ އޮފިޝަލުން އަންނަ ސީޒަނުގައި ސަލާހު އެ ޓީމުގައި ކުޅޭނެ ކަމުގެ ބޮޑު އުންމީދެއްގައި ތިބި ކަމަށްވެސް ރިޕޯޓުކޮށްފައިވެއެވެ.

ސަލާހުގެ ކެރިއަރާ ގުޅޭގޮތުން އޭނާ ބުނެފައިވަނީ އަދިވެސް ޔޫރަޕްގައި ދެތިން އަހަރު ކުޅުމުގެ ވިސްނުން ހުރި ކަމަށެވެ. މީގެ ކުރިން ސައުދީ އަރަބިއާގެ ޕްރޮފެޝަނަލް ލީގުގެ ކްލަބްތަކުން ސަލާހު ހޯދުމަށް މަސައްކަތްކޮށްފައިވީ ނަމަވެސް، އޭނާ އެ ހުށަހެޅުންތައް ބަލައިގަތްފައެއް ނުވެއެވެ.

އިނގިރޭސި މީޑިއާތަކުން ރިޕޯޓުކޮށްފައިވާ ގޮތުގައި، ސަލާހު ލިވަޕޫލަށް އެދިފައިވަނީ މަދުވެގެން ތިން އަހަރުގެ ކޮންޓްރެކްޓަކަށެވެ. އަދި މިހާރު ލިބެމުންދާ މުސާރައަށް އިތުރުވުމެއް ގެނައުމަށް ނުވަތަ މުސާރަ ބަދަލުނުކުރާނަމަ އިތުރު އެއް އަހަރު މަޑުކުރެވޭނެ މާއްދާއެއް ހިމެނުމަށް އެދިފައިވާ ކަމަށް ރިޕޯޓްތައް ބުނެއެވެ.

ލިވަޕޫލްގެ އެހެން ތަރިންކަމަށްވާ ޓްރެންޓް އަލެކްސަންޑަ އާނޯލްޑް އަދި ވާޖިލް ވެން ޑައިކްގެ ކޮންޓްރެކްޓްތައްވެސް މި ސީޒަނުގެ ނިޔަލަށް ހަމަވާއިރު، އެ ދެ ކުޅުންތެރިންނާއެކު ކޮންޓްރެކްޓް އާކުރުމުގެ މަޝްވަރާތައް ކުރިއަށްދާ ކަމަށް ލިވަޕޫލުން ބުނެފައި ވެއެވެ. ނަމަވެސް ސަލާހުގެ މުސްތަޤުބަލާމެދު އަދިވެސް ސުވާލު އުފެދިފައިވާ އިރު އަންނަ ސީޒަނުގައި ޕީއެސްޖީ އިން ސަލާހު ފެނުމަކީ ވަރަށް ގާތްކަމެކެވެ.