ރާއްޖޭގެ ސިޓީތަކާ ރަށްރަށުގައި "ޓޮބޭކޯ ޝިޒޭޝަން ކްލިނިކް" ގާއިމު ކުރަން ރައީސް ނިންމަވައިފި

ރާއްޖޭގެ ހުރިހާ ސިޓީތަކާއި ރަށްރަށުގައި "ޓޮބޭކޯ ސިޒޭޝަން ކްލިނިކް" ގާއިމު ކުރުމަށް ވަޒީރުންގެ މަޖިލީހުގެ ލަފާފުޅާ އެކު ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ނިންމަވައިފި އެވެ.

ރައީސުލްޖުމްހޫރިއްޔާ މިގޮތަށް ނިންމެވީ އިއްޔެ ބޭއްވެވި ވަޒީރުންގެ މަޖިލީހުގެ ބައްދަލުވުމުގައި މިނިސްޓްރީ އޮފް ހެލްތުން ހުށަހެޅުއްވި ކަރުދާހަށް މަޝްވަރާ ކުރެއްވުމަށްފަހު އެވެ.

ހެލްތް މިނިސްޓްރީން ހުށަހެޅި މި މައްސަލައާ ގުޅިގެން، ދުންފަތުގެ އިސްތިއުމާލު ކުރުން ހުއްޓާލަން ބޭނުންވާ ފަރާތް ތަކަށް ބޭނުންވާ ބޭސް، އެސްޓީއޯ މެދުވެރިކޮށް ރާއްޖޭގެ ހުރިހާ ސިޓީ ތަކާއި އަތޮޅު ހޮސްޕިޓަލް ގާއިމު ކޮށްފައިވާ ރަށްރަށުން ލިބޭނެ އިންތިޒާމު ހަމަޖެއްސުމަށް ރައީސް ވަނީ ނިންމަވާފަ އެވެ.

މީގެއިތުރުން، ސިއްހީ ހިދުމަތް ފޯރުކޮށްދޭ ހުރިހާ ތަނެއްގައި، ސިއްހީ ހިދުމަތް ދިނުމުގެ ގާނޫނުގެ ދަށުން ޕްރިވެންޓިވް ހެލްތު ކެއާގެ ހިދުމަތެއްގެ ގޮތުގައި ސިޒޭޝަންގެ ހިދުމަތް ދިނުމަށް ރައީސް ހަމަޖައްސަވާފައިވެ އެެވެ.

ދުންފަތުގެ އިސްތިއުމާލު ކުރުން މަދު ކުރުމަށްޓަކައި ސަރުކާރުން އެކުލަވާލާފައިވާ މާސްޓާ ޕްލޭންގެ ދަށުން، ރައީސް ވަނީ މުހިންމު ގިނަ އިސްލާހުތަކެއް ތައާރަފު ކުރައްވާފަ އެވެ.

މި އިސްލާހު ތަކުގެ ތެރޭގައި ދުންފަތް ކޮންޓްރޯލު ކުރުމާ ބެހޭ ގާނޫނާއި، އެކްސްޕޯޓް އިމްޕޯޓް ގާނޫނަށް ގެނެވުނު އިސްލާހުތައް ހިމެނެ އެވެ.

މީގެ ސަބަބުން ދުންފަތުގެ ބާވަތް ތަކާއި، ދުންފަތުގެ އިސްތިއުމާލު ކުރުމަށާއި، ވޭޕް ކުރުމަށް ބޭނުން ކުރާ އިލެކްޓްރޯނިކް ވަސީލަތް ތަކުގެ އިމްޕޯޓް ޑިއުޓީއަށް ވަނީ ބޮޑެތި ބަދަލުތަކެއް އައިސްފަ އެވެ.