ހުޅުމާލޭގެ ދެވަނަ ފިޔަވަހިން އިތުރު 10 ބިން ވިއްކުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބީލަމަށް ހުޅުވާލައިފިއެވެ.
މި ބިންތައް ވިއްކުމަށް ހަމަޖެހިފައިވަނީ ހަމައެކަނި ދިވެހިންނަށެވެ.
އެޗްޑީސީން މަޢުލޫމާތު ދެއްވި ގޮތުގައި މި ބިންތަކުގެ ތެރޭގައި ހިމެނެނީ ހުޅުމާލެ ފޭސް 2 ގެ ގޮނޑުދޮށާ ދިމާލުން ދޫކުރާ 3 ބިމާއި، ގޮނޑުދޮށް ހިމެނޭ ސަރަހައްދާ ކައިރިން ދޫކުރާ 7 ބިމެވެ. ބީޗް ފްރަންޓުން ވިއްކާ ބިންތަކުގެ ބޮޑުމިނަކީ 1،559 އަކަފޫޓާއި 3،250 އަކަފޫޓާ ދެމެދުގެ އަދަދެކެވެ. ބީޗް ސައިޑުން ވިއްކާ ބިންތަކުގެ ބޮޑުމިނަކީ 1،230 އަކަފޫޓާއި 1،534 އަކަފޫޓާ ދެމެދުގެ އަދަދެކެވެ.
މި ބީލަމުގައި ބައިވެރިވެވޭނީ ހަމައެކަނި ދިވެހިންނަށާއި 100 އިންސައްތަ ދިވެހިންގެ ހިއްސާ އޮންނަ ކުންފުނިތަކަށެވެ. ބީލަން ފެށޭ އަގަކީ ބީޗް ސައިޑުން އަކަފޫޓަކަށް 4،000 ރުފިޔާ އަދި ބީޗް ފްރަންޓުން އަކަފޫޓަކަށް 4،500 ރުފިޔާއެވެ.
ބިން ވިއްކުމުގެ މަސައްކަތް ކުރިއަށް ގެންދާނީ ދެ މަރުހަލާއަކަށް ބަހާލައިގެންނެވެ. ފުރަތަމަ މަރުހަލާގައި އެކްސްޕްރެޝަން އޮފް އިންޓަރެސްޓް (އީއޯއައި) ހުށަހަޅަންޖެހޭނެއެވެ. ދެވަނަ މަރުހަލާގައި، އެއް ބިމަކަށް އެއް ފަރާތަށްވުރެ ގިނަ ފަރާތުން އީއޯއައި ހުށަހަޅާފައިވާނަމަ، ބިޑް ކުރިއަށް ގެންދެވޭނެއެވެ.
އެޗްޑީސީން މިއަހަރު ތެރޭގައި މީގެ ކުރިން ތިން ފަހަރެއްގެ މަތިން ހުޅުމާލޭ ފޭސް 2 އިން ދިރިއުޅުމުގެ ބޭނުމަށް ބިން ވިއްކުމަށް ހުޅުވާލާފައިވެއެވެ. އަދި 2021 އަދި 2022 ވަނަ އަހަރުވެސް ހުޅުމާލެ ފޭސް 2 އިން ބީލަމުގެ އުސޫލުން ދިރިއުޅުމުގެ ބޭނުމަށް ބިން ވިއްކާފައިވެއެވެ.
ކޮމެންޓް