ސިޓީ ބަލިކޮށް ލީގުގެ އެއްވަނައިގައި ލިވަޕޫލުން 9 ޕޮއިންޓުގެ ލީޑެއް ނަގައިފި

އިނގިރޭސި ޕްރިމިއާ ލީގުގައި މިރޭ މެންޗެސްޓާ ސިޓީ އަތުން 2-0 އިން މޮޅުވެ، ލިވަޕޫލުން ލީގުގެ އެއްވަނައިގައި ނުވަ ޕޮއިންޓުގެ ލީޑެއް ނަގައި ހަމަޖެހިލައިފިއެވެ.

މި މޮޅާއެކު ލިވަޕޫލް އެއްވަނައިގައި އޮތީ 13 މެޗުން 34 ޕޮއިންޓާ އެކުގައެވެ.

ރޭގެ މެޗުގައި ލިވަޕޫލުން ފުރަތަމަ ލަނޑު ޖެހީ މުހައްމަދު ސަލާހު ދިން ބޯޅައަކުން ކޯޑީ ގަކްޕޯ ޖެހި ގޯލުންނެވެ. ދެވަނަ ލަނޑު ޖެހީ މެޗުގެ 78 ވަނަ މިނިޓްގައި ސަލާހު ޖެހި ޕެނަލްޓީންނެވެ. މިއީ ލިވަޕޫލްގެ ލުއިޒް ޑިއާޒަށް ސިޓީގެ ގޯލު ބެލެހެއްޓި ކީޕަރު، ސްޓެފަން އޯޓޭގާ ކުރި ފައުލަކަށް ރެފްރީ ދިން ޕެނަލްޓީއެކެވެ.

މިއީ ލީގުގައި ސިޓީން ޖެހިޖެހިގެން ބަލިވި ހަތަރުވަނަ މެޗެވެ. ސިޓީން އެންމެ ފަހުން ލީގުގައި ޖެހިޖެހިގެން ހަތަރު މެޗުން ބަލިވީ 2012 ވަނަ އަހަރުއެވެ. އަނެއްކޮޅުން، ޕެޕް ގާޑިއޯލާގެ ކޯޗުކަމުގައި ކުޅޭ ސިޓީން މިވަނީ މޮޅެއް ނުލިބި ހަތް މެޗު ފުރިހަމަކުރަން ޖެހިފައެވެ.

ލީގުގައި މިރޭ އެހެން މެޗުތަކުގައި މެންޗެސްޓާ ޔުނައިޓެޑުން ވަނީ 4-0 އިން އެވަޓަން ބަލިކޮށްފައެވެ. އަދި ޗެލްސީން ވަނީ 3-0 އިން އެސްޓަން ވިލާ ބަލިކޮށްފައެވެ. ފުލަމްއިން ވަނީ ޓޮޓެންހަމް ހޮޓްސްޕާސް ދަނޑުގައި ކުޅުންތެރިއަކު މަދުކޮށް މެޗު ނިންމަން ޖެހުނު ނަމަވެސް 1-1 އިން އެއްވަރުކޮށްފައެވެ.