މިދިޔަ ދެ އަހަރު ރާއްޖޭގައި 9 މީހަކަށް އެޗްއައިވީ ޖެހިފައިވޭ

އެއިޑްށް ބައްޔަކީ މިހާތަނަށް ފަރުވާއެއް ހޯދިފައި ނުވާ ބައްޔެއް

ރާއްޖޭގައި މިދިޔަ އަހަރާއި މި އަހަރު އެކަނި ނުވަ މީހަކަށް، އެކުއައިޑް އިމިއުނޯޑެފިޝެންސީ ސިންޑްރޯމް (އެއިޑްސް) ޖައްސާ ހިއުމަން އިމިއުނޯޑެފިޝެންސީ ވައިރަސް (އެޗްއައިވީ) ފެތުރިފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސްހިސާބުން ދައްކައިފިއެވެ.

އެޗްޕީއޭއިން ހާމަކުރި މަޢުލޫމާތުގައިވާ ގޮތުން، ރާއްޖޭގައި އެޗްއައިވީ އެންމެ ފުރަތަމަ ފެނުނީ 1991 ވަނަ އަހަރުއެވެ. އޭގެފަހުން މި އަހަރުގެ އޮކްޓޯބަރު 31 ގެ ނިޔަލަށް އެޗްއައިވީ ޖެހުނު މީހުންގެ އަދަދު ވަނީ 49 އަށް އަރާފައެވެ.

މިހާރު އެޗްއައިވީއަށް ފަރުވާ ހޯދަމުންދާ މީހުންގެ ތެރޭގައި، މިދިޔަ އަހަރު އެޗްއައިވީ ޖެހުނު ތިން މީހަކާއި މި އަހަރު އެ ވައިރަހަށް ޕޮޒިޓިވްވި ހަ މީހެއް ހިމެނެއެވެ. މިއީ ކުރީ އަހަރުތަކާ އަޅާބަލާއިރު އިތުރުވަމުންދާ މިންވަރެކެވެ.

އެޗްއައިވީ ވައިރަސް ހަށިގަނޑަށް އެރުމަށްފަހު، އަހަރުތަކެއްގެ ތެރޭގައި ހަށިގަނޑުގެ ދިފާޢީ ނިޒާމު ބަލިކަށިކޮށްލައެވެ. މީގެ ސަބަބުން އާންމުކޮށް ނުޖެހޭ އެތައް ބަލިތަކެއް ޖެހެން ފަށައެވެ. އެއިޑްސް ޖެހިފައިވާ ކަމަށް ބެލެވެނީ އެ ހިސާބުންނެވެ.

އެޗްއައިވީއަށް ދޭ ފަރުވާއަކީ އެންޓިރެޓްރޯ ވައިރަލް ޓްރީޓްމަންޓެވެ. 2004 ވަނަ އަހަރުން ފެށިގެން ރާއްޖޭގައި ވެސް މި ފަރުވާ އަންނަނީ ދެމުންނެވެ. މިއީ މުޅިން ހިލޭ ފޯރުކޮށްދޭ ފަރުވާއެކެވެ. އަދި އެޗްއައިވީއިން ރައްކާތެރިވުމުގެ ގޮތުން ދޭ ފަރުވާ ޕްރީ އެކްސްޕޯޝާ ޕްރޮފިލެކްސިސް (ޕްރެޕް) ވެސް ރާއްޖޭގައި ލިބެން ހުރެއެވެ.

ސިއްޙަތު އެޗްޕީއޭ