އީފާސްގެ އޮންލައިން ފޭސް ވެރިފިކޭޝަން ޚިދުމަތް އަލުން ފަށައިފި

ނެޝަނަލް ޑިޖިޓަލް އައިޑެންޓިޓީ، އީފާސް އިން އޮންލައިން ފޭސް ވެރިފިކޭޝަންގެ ޚިދުމަތް އަލުން ފަށައިފިއެވެ.

މި ޚިދުމަތް ވަގުތީގޮތުން މެދުކަނޑާލާފައި އޮތީ ޚިދުމަތް ފޯރުކޮށްދޭ ފަރާތް ބަދަލުކުރުމަށްޓަކައެވެ.

އީފާސް ބަލަހައްޓާ ނޭޝަނަލް ސެންޓަރ ފޯ އިންފޮމޭޝަން ޓެކްނޮލޮޖީ (އެންސީއައިޓީ) އިން މަޢުލޫމާތު ދެއްވާފައިވާ ގޮތުގައި، މިހާރު މި ޚިދުމަތް ފޯރުކޮށްދެނީ ލެޓްވިއާގައި ރަޖިސްޓަރީކޮށްފައިވާ ރެގިއުލާ ފޮރެންސިކްސް ކުންފުނީގެ އެޕްލިކޭޝަނެއް މެދުވެރިކޮށެވެ.

އެންސީއައިޓީން އިތުރަށް ވިދާޅުވީ މި ޚިދުމަތް ދޭނީ ބޭރުގެ އެއްވެސް ފަރާތަކަށް ރައްޔިތުންގެ ފޮޓޯ ނުވަތަ އެހެން ޒާތީ މަޢުލޫމާތެއް ހިއްސާކުރުމަކާ ނުލައި، އެންސީއައިޓީގެ އެތެރޭގައި ކަމަށެވެ. މިހާރު މި ޚިދުމަތް ލިބެނީ އީފާސް ވެބްސައިޓް މެދުވެރިކޮށް ކަމަށާއި، އާންމުކޮށް ބޭނުންކުރާ ހުރިހާ ބްރައުޒަރަކުން މި ޚިދުމަތް ލިބޭނެ ކަމަށްވެސް އެންސީއައިޓީން ވިދާޅުވިއެވެ.

އެންސީއައިޓީއާ ހަވާލުވެ ހުންނެވި ދާޚިލީ ސަލާމަތާއި ފަންނިއްޔާތާބެހޭ ވުޒާރާގެ ސްޓޭޓް މިނިސްޓަރު، ޑރ. މުހައްމަދު ކިނާނަތު ވިދާޅުވީ އެ އިދާރާގެ އަމާޒަކީ އީފާސްގެ ނިޒާމް ދުވަހެއް ދުވަހަކަށް ހަރުދަނާކޮށް، ރައްޔިތުންނާއި މުއައްސަސާތަކުގެ އިތުބާރާއި ޔަޤީންކަން ލިބިފައިވާ ނިޒާމަކަށް ހެދުން ކަމަށެވެ.

އީފާސްގެ މުހިންމު އެއް ބޭނުމަކީ ދައުލަތުން ފޯރުކޮށްދޭ ޑިޖިޓަލް ޚިދުމަތްތައް ފޯރުކޮށްދިނުމުގައި އެ ޚިދުމަތް ދެވެނީ ޚިދުމަތަށް އެދޭ އަސްލު ފަރާތަށްކަން ކަށަވަރުކުރުމެވެ. މިއީ އެހެން މީހުންގެ އައިޑެންޓިޓީ ވަގަށް ނަގައި އޮޅުވާލައިގެން މުޢާމަލާތްތައް ހިންގުމުގެ ފުރުޞަތު ހަނިކުރުމަށް ފަށާފައިވާ ޚިދުމަތެކެވެ.