ކޭ-ޕާކް އެޕާޓްމަންޓްތަކުގެ މަސައްކަތް މާޗު މަހުގެ ނިޔަލަށް ނިންމަން އަންގައިފި

ހުޅުމާލޭގައި ހަދަން ފަށާ ނުނިމި ހުރި ކޭ-ޕާކް އެޕާޓްމަންޓްތަކުގެ މަސައްކަތް އަންނަ މާޗު މަހުގެ ނިޔަލަށް ނިންމުމަށް އެޗްޑީސީން އަންގައިފިއެވެ.

މި މަޢުލޫމާތު ހާމަވެފައިވަނީ އެޗްޑީސީން ރައްޔިތުންގެ މަޖިލީހަށް ފޮނުވި ލިޔެކިޔުންތަކަކުންނެވެ.

2016 ވަނަ އަހަރު ކޮރެއާގެ ކުންފުންޏެއް ކަމަށްވާ ހަންބޯއާ ހަވާލުކުރެވުނު މި މަޝްރޫޢުގެ މަސައްކަތް އަދިވެސް ކުރިއަށްދަނީ އެޗްޑީސީއާއެކު ވެފައިވާ އެއްބަސްވުމުގެ ދަށުން ހަންބޯ ކޮމްޕެނީ ލިމިޓެޑުންނެވެ. އަސްލު އެއްބަސްވުމުގައިވާ ގޮތުން، މަޝްރޫޢު ނިންމަން ދެވިފައިވަނީ ދެ އަހަރުގެ މުއްދަތެކެވެ. ނަމަވެސް މިހާރު ހަތް އަހަރު ވެއްޖެއެވެ.  

މި މަޝްރޫޢުގެ ލަސްވުމާ ގުޅިގެން ގިނަ މައްސަލަތަކެއް ވަނީ ކުރިމަތިވެފައެވެ. އޭގެ ތެރޭގައި ހަންބޯގެ އެއް ހިއްސާދާރު، ހަސަން މަމްދޫހު (މަންޑޭ) އެޕާޓްމަންޓްތައް މަކަރާއި ހީލަތުން ވިއްކާފައިވާ ކަމަށް ތުހުމަތުކުރެވޭ މައްސަލައެއް ހިމެނެއެވެ. މީގެ އިތުރުން، މަޝްރޫޢު ނުނިމި ލަސްވުމުގެ ސަބަބުން ފްލެޓް ގަތް ފަރާތްތަކަށް ލިބުނު ގެއްލުމުގެ ބަދަލު ހޯދުމަށް ގިނަ ބަޔަކު ސިވިލް ކޯޓަށް މައްސަލަ ހުށަހަޅަމުންދާކަން ފާހަގަކުރެވެއެވެ.

އެޗްޑީސީން މަޖިލީހުގެ ކޮމިޓީއަށް ދިން މަޢުލޫމާތުތަކުގައިވާ ގޮތުން، މަޝްރޫޢު ލަސްވަމުންދާތީ އެކި ފަހަރު މަތިން އެއްބަސްވުން އާކޮށް މުއްދަތު އިތުރުކުރަމުން ގޮސްފައިވެއެވެ. އެންމެ ފަހުން އެކަމުގައި އެޗްޑީސީން ކޮށްފައިވާ މުޢާމަލާތަކީ އާ އެއްބަސްވުމެއްގެ އިސްލާހެއްގައި ދެ ފަރާތުން ސޮއިކުރުމެވެ. މި އިސްލާހުގައި މަސައްކަތް ނިންމުމުގެ މުއްދަތު 30 މާޗު 2025 އަށް އިތުރުކުރުމަށް ނިންމާފައިވެއެވެ.

ނަމަވެސް، ކޭ ޕާކް މަޝްރޫޢުގައި ހިޔާނާތުގެ މައްސަލަތަކެއް ފެންމަތިވި ނަމަވެސް، މަޝްރޫޢު ހިންގާ މައި ކުންފުނި ހަމްބޯ ޓެކް ކޮރެއާއިން ވަނީ އެ މަޝްރޫޢު ނުހުއްޓި ކުރިއަށްދާނެ ކަމުގެ ޔަގީންކަން މީގެ ކުރިން ދީފައެވެ. އެ ކުންފުނިން ބުނެފައިވަނީ މައްސަލަ ޖެހުނީ ރާއްޖޭގެ އެޖެންޓް ކުންފުނި، ހަންބޯ މޯލްޑިވްސްއާ ދެމެދު ކަމަށެވެ.