ސްޕެނިޝް ލީގުގެ އެއްވަނައިގައި އޮތް ބާސެލޯނާ ރޭ ކުޅުނު މެޗުން އަމިއްލަ ދަނޑުގައި ލަސް ޕަލްމާސް އަތުން 2-1 އިން ބަލިވެއްޖެއެވެ.
މިއީ 1971 ވަނަ އަހަރުގެ ފަހުން، ބާސެލޯނާ ދަނޑުގައި ލަސް ޕަލްމާސްއިން ހޯދި ފުރަތަމަ މޮޅެވެ.
ރޭގެ ނަތީޖާއާ އެކު، ލީގުގެ އެއްވަނައިގައި ބާސެލޯނާ މި ވަގުތު އޮތީ ދެވަނައިގައި އޮތް ރެއާލް މެޑްރިޑަށް ވުރެ ދެ މެޗު އިތުރަށް ކުޅެގެން ހަތަރު ޕޮއިންޓުގެ ލީޑަކާ އެކުގައެވެ. ބާސެލޯނާއަށް 15 މެޗުން 34 ޕޮއިންޓް ލިބިފައިވާއިރު، ރެއާލަށް 13 މެޗުން ވަނީ 30 ޕޮއިންޓް ލިބިފައެވެ.
ރޭގެ މެޗުގެ މެޗުގެ ފުރަތަމަ ހާފުގައި ދެ ޓީމުން ކުރެ އެއް ޓީމަކަށް ލަނޑެއް ޖެހިފައެއް ނުވެއެވެ. ދެވަނަ ހާފު ފެށިގެން ހަތަރު މިނިޓް ތެރޭ ލަސް ޕަލްމާސްއިން ލީޑުނެގިއެވެ. އެ ޓީމުގެ ލަނޑު ޖެހީ ސަންޑްރޯ ރަމިރޭޒްއެވެ.
ބާސެލޯނާއިން ނަތީޖާ ހަމަހަމަކުރީ މެޗުގެ 61 ވަނަ މިނިޓުގައެވެ. މި ލަނޑު ޖެހީ ރަފީނިއާއެވެ. ނަމަވެސް ލަސް ޕަލްމާސްއިން މެޗުން މޮޅުވި ގޯލު ޖެހީ ބާސެލޯނާއިން އެއްވަރުކުރިތާ އަށް މިނިޓް ފަހުންނެވެ. މި ލަނޑު ޖެހީ ފަބިއޯ ސިލްވާއެވެ.
މިއީ ހަންސީ ފްލިކްގެ ކޯޗުކަމުގައި ބާސެލޯނާއިން ލީގުގައި ބަލިވި ތިންވަނަ މެޗެވެ. މި މެޗަކީ ބާސެލޯނާގެ 125 ވަނަ އަހަރީ ދުވަސް ފާހަގަކުރުމަށް ފަހު ކުޅުނު ފުރަތަމަ މެޗެވެ.
ކޮމެންޓް