ގާނޫނުތަކާއި ގަވާއިދުތަކުގެ އިމުގެ ތެރޭގައި ޚިޔާލު ފާޅުކުރުމުގެ މިނިވަންކަން އެންމެ ފުޅާ ދާއިރާއެއްގައި މި ސަރުކާރުން ކަށަވަރުކޮށްދޭނެކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވެއްޖެއެވެ.
މިނިސްޓަރ އިހުސާން މިފަދައިން ވިދާޅުވެފައި ވަނީ އެމްޑީޕީގެ އެކްޓިވިސްޓެއް ސޯޝަލް މީޑިއާގައި ކުރި ޕޯސްޓަކާ ގުޅިގެން ފުލުހުންގެ ތަޙުޤީޤަށް ހާޒިރުކުރަން އެންގުމާ ގުޅިގެންނެވެ.
އެމްޑީޕީގެ އެކްޓިވިސްޓު ހުސެއިން ޝާފިއު، އެކްސްގައި ކުރި ޕޯސްޓެއްގައި ރައީސް ޑރ. މުޙައްމަދު މުޢިއްޒަށް ނިސްބަތްކޮށް ހަޑިހުތުރު ބަހުން މުޚާޠަބުކޮށް، "މަށަށް ކަލޭ މަގެއް މަތިން ނުފެންނާތި!" މިފަދައިން ބުނެފައިވާ ކަމަށް ވެއެވެ. މި ޕޯސްޓާ ގުޅިގެން އިދިކޮޅު ފަރާތްތަކުން ދަނީ ސަރުކާރުން ޚިޔާލު ފާޅުކުރުމުގެ މިނިވަންކަމަށް ހުރަސްއަޅާ ކަމަށް ބުނެ ފާޑުކިޔަމުންނެވެ.
އެމްޑީޕީގެ ޗެއަރޕާސަން ފައްޔާޒް އިސްމާޢީލް ވިދާޅުވެފައިވަނީ، މި ސަރުކާރުން ރައީސުލްޖުމްހޫރިއްޔާއާއި ސަރުކާރުގެ އިސްވެރިންގެ "އަބުރުފުޅު" ގެ ނަމުގައި ރައްޔިތުންގެ އަޑު ކަނޑުވާލައި، ޚިޔާލު ފާޅުކުރުމަށް ހުރަސްއަޅަމުންދާ ކަމަށެވެ. އަދި ސަރުކާރާމެދު ހިތްހަމަނުޖެހުން ފާޅުކުރުމަކީ ބޮޑު ކުށަކަށް ވެފައިވާ ކަމަށްވެސް އޭނާ ވިދާޅުވިއެވެ.
މިނިސްޓަރު އިހުސާން މިކަމާ ގުޅޭގޮތުން ވިދާޅުވެފައިވަނީ، ޝާފިއުގެ ޕޯސްޓުގައި ވަކި މީހަކަށް ޖިސްމާނީ ގެއްލުމެއް ދީފާނެކަމުގެ ބިރުދެއްކުމުގެ މާނަ ދޭހަވާތީ، އެކަން ތަޙުޤީޤުކުރުމަކީ ކަމާބެހޭ އިދާރާތަކުގެ ޒިންމާއެއް ކަމަށެވެ. އަދި މިފަދަ ބަސްތައް ފައްޔާޒަށް ނިސްބަތްކޮށް ބުނެފިނަމަ، އެކަމާމެދު ފިޔަވަޅު ނޭޅި ދޫކޮށްލަންވީތޯ ސުވާލު އުފައްދަވާފައިވެއެވެ.
މިނިސްޓަރު އިހުސާން އިތުރަށް ވިދާޅުވެފައިވަނީ، ސަރުކާރުން ހުރިހާ ރައްޔިތުންގެ ހަށިގަނޑާއި ފުރާނަ ރައްކާތެރިކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށެވެ. އަދި ކޮންމެ ކަމަކީ ސިޔާސީ ކުޅިވަރަކަށް ހެދުމަކީ ޒިންމާދާރު ގޮތެއް ނޫން ކަމަށްވެސް އޭނާ ފާހަގަކުރެއްވިއެވެ.
ކޮމެންޓް