ފަލަސްޠީނުގެ ޣައްޒާއާއި ލުބްނާންގެ މުސްލިމުންގެ ނަސްލު ނައްތާލުމަށްޓަކައި، ލާއިންސާނީ ޖަރީމާތައް ހިންގަމުންދާ ޒަޔަނިސްޓު އިސްރާއީލުގެ ވެރިންނަށް މަރުގެ އަދަބު ދިނުމަށް އީރާނުގެ ރޫހީ ވެރިޔާ އާޔަތުالله ޢަލީ ހާމަނާއީ ގޮވާލައްވައިފިއެވެ.
އޭނާ މިފަދައިން ގޮވާލައްވާފައި މި ވަނީ، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާއި ކުރީގެ ދިފާޢީ ވަޒީރު ޔޮއާވް ގަލާންޓް ހައްޔަރުކުރުމަށް ބައިނަލްއަޤުވާމީ ޖިނާޢީ ކޯޓު (އައިސީސީ)ން ނެރެފައިވާ އަމުރަށް އިޝާރާތް ކުރައްވައެވެ.
ޚާމަނާއީ ވިދާޅުވީ، ހައްޔަރު ކުރުމުގެ އަމުރު ނެރުމުގެ ބަދަލުގައި ޒަޔަނިސްޓު އިސްރާއީލުގެ ވެރިންގެ މައްޗަށް އިއްވަންވީ މަރުގެ ޙުކުމް ކަމުގައެވެ. އައިސީސީގެ އަމުރުގައި ބުނެފައި ވަނީ، ޣައްޒާގެ މުސްލިމުން ޝަހީދު ކުރުމާއި، ހައިހޫނުކަމަކީ ހަނގުރާމައިގެ ހަތިޔާރެއްގެ ގޮތުގައި ބޭނުން ކުރުމާއި، ދުރާލައި ރާވައިގެން ގަސްދުގައި ޣައްޒާގެ މުސްލިމުންގެ ނަސްލު ނައްތާލުމަށް ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތަކުގެ ޖިނާޢީ ޒިންމާ އެ ދެ މީހުން އުފުލަން ޖެހޭނެ ކަމަށް ޤަބޫލު ކުރެވޭ ކަމުގައެވެ.
އައިސީސީގެ އަމުރަށް އިސްރާއީލުން ވަނީ ވަރަށް ބޮޑަށް ފާޑުކިޔާފައެވެ. ނަމަވެސް، އައިސީސީގެ އަމުރާ އެކު، ޔަހޫދީންގެ ލާއިންސާނީ ޖަރީމާތަކުގެ ޝިކާރައަކަށްވެ، ނިކަމެތިފައިވާ ޣައްޒާގެ ރައްޔިތުންނަށް ކޮންމެ ވެސް ވަރެއްގެ އުންމީދެއް ލިބިގެން ގޮސްފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ކޮމެންޓް