ލިވަޕޫލް ދޫކޮށްލުމުގެ ފުރުސަތު ބޮޑު: ސަލާހު

ލިވަޕޫލުން މިހާތަނަށް އޭނާ އަށް އާ ކޮންޓްރެކްޓެއް ނުދޭ ކަމަށާއި މިހާރު އޮތް ހާލަތަށް ބަލާއިރު އޭނާ ލިވަޕޫލް ދޫކޮށްލުމުގެ ފުރުސަތު ބޮޑު ކަމަށް ލިވަޕޫލްގެ މިސްރު ފޯވާޑް، މުހައްމަދު ސަލާހު ބުނެފި އެވެ.

މިއީ، މި ސީޒަނުގެ ނިޔަލަށް ލިވަޕޫލްގެ ކޮންޓްރެކްޓްގައި ހުރި ސަލާހު، 32، އެ ކްލަބްގެ މުސްތަގުބަލާ ބެހޭގޮތުން ވާހަކަ ދެއްކި ދެ ވަނަ ފަހަރެވެ.

ސައުތެމްޓަން އަތުން ލިވަޕޫލް މޮޅުވި މެޗުގައި ދެ ގޯލު ޖެހި ސަލާހު ބުނެފައިވަނީ، މިހާތަނަށް އައިއިރު ލިވަޕޫލްގެ ފަރާތުން އޭނާ އަށް އާ ކޮންޓްރެކްޓެއް ހުށަނާޅާ ކަމަށެވެ. އޭނާ ބުނި ގޮތުގައި މި ކްލަބްގައި މަޑުކުރުމަށް ވުރެ ބޮޑަށް ދިއުމުގެ ފުރުސަތު ބޮޑެވެ.

"އަހަރެން މި ކްލަބްގައި ވަރަށް ގިނަ އަހަރުތަކެއް ވެއްޖެ، އަހަރެން ސަޕޯޓަރުން ދެކެ ވަރަށް ލޯބިވޭ، މިއީ، ހަގީގަތުގައި ސަޕޯޓަރުންގެ ކަމެއް ނޫން، މިއީ ކްލަބުން އަންނަން ޖެހޭ ކަމެއް، އަހަންނާއި ލިވަޕޫލް ސަޕޯޓަރުންގެ ގުޅުން އަބަދުވެސް ރަނގަޅު. މި ކަން މި އޮތީ އަހަރެން އަތުގައި ވެސް އަދި ސަޕޯޓަރުން އަތުގައެއް ވެސް ނޫން،" ސަލާހު ބުންޏެވެ.

ލިވަޕޫލާ 2017 ވަނަ އަހަރު ގުޅުނު ސަލާހު، އެންމެ ފަހުން އެ ޓީމުގެ ކޮންޓްރެކްޓް އާ ކުރީ، 2022 ވަނަ އަހަރު އެވެ. އެއީ ތިން އަހަރުގެ ކޮންޓްރެކްޓެކެވެ. ހަފްތާ އަކު، 370،000 ޑޮލަރު ލިބޭ އެއްބަސްވުން، އަންނަ ޖޫން މަހުގެ ނިޔަލަށް ހަމަވާނެ އެވެ.

ސަލާހުގެ އިތުރުން، ލިވަޕޫލްގެ ޓްރެންޓް އަލެކްސަންޑަ އާނޯލްޑް އާއި ވާޖިލް ވެން ޑައިކް ވެސް ކޮންޓްރެކްޓްގައި ހުރީ މި ސީޒަނުގެ ނިޔަލަށެވެ. ލިވަޕޫލުން ވެން ޑައިކާއި އާނޯލްޑްއާ އެކު އަންނަނީ ކޮންޓްރެކްޓް އާ ކުރުމުގެ މަޝްވަރާތައް ކުރަމުންނެވެ.