ރާއްޖޭގައި ފުރަތަމަ ފަހަރަށް އޭ ލެވެލްގައި މެރިން ސައިންސް ކިޔަވައިދޭން ފަށައިފި

ސީއެޗްއެސްސީގައި މިއަދު ބޭއްވި ރަސްމިއްޔާތުގެ ތެރެއިން

ރާއްޖޭގައި ފުރަތަމަ ފަހަރަށް އޭ ލެވެލްގައި މެރިން ސައިންސް މާއްދާ ކިޔަވައިދޭން ފަށައިފިއެވެ.

މި މާއްދާ ކިޔަވައިދޭން ފެށީ ސެންޓަރ ފޯ ހަޔަރ ސެކަންޑަރީ އެޑިއުކޭޝަން (ސީއެޗްއެސްއީ) ގައެވެ.

ސީއެޗްއެސްއީގައި މިދިޔަ ސެޕްޓެމްބަރު މަހު އޭ ލެވެލް ފެށިއިރު މެރިން ސައިންސް ކިޔަވައިދޭން ފެށި ނަމަވެސް، ރަސްމީކޮށް މިކަން ފާހަގަކުރީ އިއްޔެއެވެ. މި ރަސްމިއްޔާތުގައި މޯލްޑިވްސް މެރިން ރިސާޗު އިންސްޓިޓިއުޓުގެ މެރިން ބަޔޮލޮޖިސްޓް ޑރ. އަހުމަދު ރިޔާޒް ޖައުހަރީ ބައިވެރިވެވަޑައިގަތެވެ.

ސީއެޗްއެސްއީގެ ޕްރިންސިޕަލް އަބްދުﷲ ދީދީ ވިދާޅުވި ގޮތުގައި އެ ސްކޫލުގައި 14 ދަރިވަރުން މެރިން ސައިންސް ކިޔަވަމުންދެއެވެ. މީގެ އިތުރުން ހުޅުމާލެ ސްކޫލުގައި ހަތް ދަރިވަރުން މި މާއްދާ ކިޔަވަމުންދާ ކަމަށް މަޢުލޫމާތު ލިބިފައިވެއެވެ.

ރާއްޖޭގައި ފިޝަރީޒް ސައިންސް ކިޔަވައިދޭން ފެށީ 1984 ވަނަ އަހަރު މަޖީދިއްޔާ އާއި އަމީނިއްޔާ ސްކޫލުގައެވެ. އެ މާއްދާއިން ފުރަތަމަ ފަހަރަށް އޯ ލެވެލް އިމްތިހާނު ހެދީ 1987 ވަނަ އަހަރުއެވެ. މިހާރު މެރިން ސައިންސް ކިޔަވައިދޭން މި ފެށީ އޯ ލެވެލްގައި ފިޝަރީޒް ސައިންސް ކިޔަވައިދޭން ފެށިތާ 40 އަހަރަށްފަހުގައެވެ.

ސީއެޗްއެސްއީގައި މެރިން ސައިންސްގެ އިތުރުން މެރިން ބަޔޮލޮޖީ، ޓްރެވަލް އެންޑް ޓޫރިޒަމް، ސައިކޮލޮޖީ އަދި ކޮމްޕިއުޓަރ ސައިންސް ވެސް ވަނީ އަލަށް ކިޔަވައިދޭން ފަށައިފައެވެ.

އެޑިއުކޭޝަން މިނިސްޓްރީ ފިޝަރީޒް