މަޤާމުގެ މަސްއޫލިއްޔަތު އަދާކުރުމުގައި އިހުމާލުވެ، ޤާނޫނާ ޚިލާފު އެތައް ކަމެއް ކުރިކަމުގެ ބޮޑެތި ތުހުމަތުތަކާ އެކު އިލެކްޝަންސް ކޮމިޝަން (އީސީ)ގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފް ވަކިކުރަން ރައްޔިތުންގެ މަޖިލީހުން މިއަދު ފާސްކޮށްފިއެވެ.
މިނިވަން މުއައްސަސާތަކުގެ ކޮމިޓީން ހުށަހެޅި ރިޕޯޓުގައި، ރިޔާސީ އިންތިޚާބުގައި އީސީގެ ޑޭޓާބޭސްއިން މަޢުލޫމާތު ނަގައިގެން ނަޝާތު ވަނީ އެޕްލިކޭޝަންތައް ހަދައި، އެ އެޕްލިކޭޝަންތައް ވިއްކައި ބައެއް ސިޔާސީ ޕާޓީތަކަށް ދީފައިވާ ކަމަށް ތުހުމަތުކޮށްފައިވެއެވެ. އަދި، ވަކި ސިޔާސީ ޕާޓީއަކަށް ރިޔާސީ އިންތިޚާބު ކާމިޔާބުކޮށްދިނުމަށް އެ ތިން މެންބަރުން އެކުގައި މަސައްކަތް ކޮށްފައިވާ ކަމަށް ވެސް ރިޕޯޓުގައި ބުނެފައިވެއެވެ.
މިއަދު ނެގި ވޯޓުގައި އީސީގެ ނައިބު ރައީސް އަލީ ނަޝާތު ވަކިކުރުމަށް 69 މެންބަރުން ވޯޓުދެއްވިއިރު، 10 މެންބަރުން ވަނީ ދެކޮޅަށް ވޯޓުދެއްވާފައެވެ. އަދި، އީސީގެ މެންބަރު މުހައްމަދު އާސިފް ވަކިކުރުމަށް 68 މެންބަރުން ވޯޓުދެއްވިއިރު، 10 މެންބަރުން ވަނީ ދެކޮޅަށް ވޯޓުދެއްވާފައެވެ.
އެހެންނަމަވެސް، އީސީގެ މެންބަރު ޑރ. މުހައްމަދު ޒާހިރު މަޤާމުން ވަކިނުކުރުމަށް 70 މެންބަރުންގެ އިއްތިފާޤުން ވަނީ ފާސްކޮށްފައެވެ. އަދި ސިވިލް ސަރވިސް ކޮމިޝަންގެ ރައީސް މުހައްމަދު ނާސިހު މަޤާމުން ވަކިނުކުރުމަށްވެސް މަޖިލީހުން ވަނީ ފާސްކޮށްފައެވެ.
މި މައްސަލައިގައި އެންޓި-ކޮރަޕްޝަން ކޮމިޝަން (އޭސީސީ)ގެ ދެ މެންބަރަކު ވަނީ ވޯޓަށް އެހުމުގެ ކުރިން މަޤާމުން އިސްތިއުފާދީފައެވެ. އެހެންކަމުން އެ ދެ މެންބަރުންނާ ގުޅޭ ގޮތުން ވޯޓެއް ނަގާފައެއް ނުވެއެވެ.
ކޮމެންޓް