ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ން ހުއްޓާލާފައިވާ 17 މަޝްރޫޢުގެ މަސައްކަތް އަލުން ފަށައި، އިތުރު 10 ޕްރޮޖެކްޓެއްގެ މަސައްކަތްވެސް ކުރިއަށްދާކަމަށް އެ ކުންފުނީގެ މެނޭޖިންގ ޑިރެކްޓަރު އަލީ ޒުހައިރު ވިދާޅުވެއްޖެއެވެ.
ޒުހައިރު ވިދާޅުވި ގޮތުގައި، ކުންފުންޏާ ހަވާލުވުމަށްފަހު އެންމެ ފުރަތަމަ މަސައްކަތް ފެށީ ކުންފުނި އޮތް ހާލަތުން އެހެން ހާލަތަކަށް ބަދަލުކުރެވޭނެ ގޮތްތަކެއް ހޯދުމަށެވެ. މިގޮތުން ކުންފުނީގެ ބޯޑާއި ޕީސީބީއާ މަޝްވަރާކޮށް، ކުންފުނި ރިފޯމްކުރުމުގެ މަސައްކަތް ފަށާފައިވެއެވެ.
ކުންފުނި ރިފޯމްކުރުމުގެ މަސައްކަތުގެ ދަށުން ކުރި އެންމެ މުހިންމު އެއްކަމަކީ ހިންގުމުގެ ޚަރަދު ކުޑަކުރުން ކަމަށް ޒުހައިރު ވިދާޅުވިއެވެ. މިގޮތުން ކުންފުންޏަށް ތަކެތި ގަންނާނެ ވަކި އަގުތަކެއް ކަނޑައަޅައި، މަހެއްގެ މައްޗަށް 18 އާއި 20 މިލިއަން ރުފިޔާއާ ދެމެދުގެ އަދަދެއް ޚަރަދު ކުޑަކުރެވިފައިވާ ކަމަށް އޭނާ ވިދާޅުވިއެވެ.
ޚަރަދު ކުޑަކުރުމުގެ ގޮތުން އިތުރުގަޑި ލިބޭގޮތުގެ ކޮންޓްރޯލް މެކޭނިޒަމެއް ކަނޑައަޅައި، ރަސްމީކޮށް ހަ ދުވަހު މަސައްކަތްކުރާ ކުންފުންޏެއްގެ ގޮތުގައި އާރްޑީސީ ބަދަލުކޮށްފައިވާ ކަމަށްވެސް ޒުހައިރު ވިދާޅުވިއެވެ. މި ބަދަލުތަކާއެކު، ކުރިން އާމްދަނީއާ ނުބައްދަލު މިންވަރަށް ޚަރަދުކުރަމުންދިޔަ ކުންފުނީގެ މާލީ ހާލަތު ރަނގަޅުވަމުންދާކަން ފާހަގަކުރެވެއެވެ.
ކޮމެންޓް