ފެހި ޤާނޫނު އަސާސީގެ ދަށުން ރިޔާސީ ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސަކަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގަންނަވާނެ ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
ޕީއެސްއެމް ނިއުސްގެ "ހަފްތާ 52" ޕްރޮގްރާމުގައި ވާހަކަފުޅު ދައްކަވަމުން މަޖިލީހުގެ ރައީސް ވިދާޅުވީ އެމަނިކުފާނު ސިޔާސީ ހިސާބު ޖައްސަވަނީ ރާއްޖޭގެ ސިޔާސީ މަޝްރަޙު ރަނގަޅަށް އެނގިވަޑައިގެންނެވެ.
ރައީސް މުޢިއްޒުގެ ސަރުކާރު ވަރަށް ކާމިޔާބުކޮށް ފެނިވަޑައިގަންނަވާ ކަމަށާއި، ރައްޔިތުންގެ ތާއީދު އިތުރުވަމުންދާ ކަމަށް މަޖިލީހުގެ ރައީސް ވިދާޅުވިއެވެ. އަދި ބައެއް ސިޔާސީ ލީޑަރުން މަޝްރަޙުން ގެއްލެމުންދާ ކަމަށްވެސް ފާހަގަކުރެއްވިއެވެ.
މަޖިލީހުގެ ރައީސް ވިދާޅުވީ އަމާޒަކީ ރައީސް މުޢިއްޒު ރައްޔިތުންނަށް ވެވަޑައިގެންނެވި ވަޢުދުތައް ފުއްދެވުމަށްފަހު ރިޔާސީ ދެވަނަ ދައުރެއް ކާމިޔާބުކުރުން ކަމަށެވެ.
އަންނަ އަހަރަކީ ރާއްޖޭގެ ތާރީޚުގައި ދުވަހަކުވެސް ތަރައްޤީގެ މަޝްރޫޢުތައް ނުހިނގާ މިންވަރަށް ހިނގާނެ އަހަރެއްކަން ބަޖެޓުން ފެންނަން އޮތް ކަމަށްވެސް މަޖިލީހުގެ ރައީސް ވިދާޅުވިއެވެ.
ކޮމެންޓް