ރަޝިޔާގެ ޑްރޯން ހަމަލާތަކުގައި ޔޫކްރެއިންގެ އާއްމުންގެ ދެ މީހުން މަރުވެއްޖެ

ޔޫކްރެއިންގެ އިރުއުތުރުގައި އޮންނަ ސޫމީ ސަރަޙައްދަށް ރަޝިޔާއިން ދިން ޑްރޯން ޙަމަލާތަކެއްގައި ޢާންމުންގެ ދެ މީހުން މަރުވެއްޖެއެވެ.

ސޫމީގެ އޮފިޝަލުން ބުނެފައިވަނީ ރަޝިޔާގެ އަސްކަރިއްޔާއިން ޑްރޯން ޙަމަލާތައް އަމާޒު ކޮށްފައިވަނީ އެޕާޓްމަންޓް އިމާރާތްތަކަކަށް ކަމަށެވެ. މި ޙަމަލާތަކުގައި އިތުރު 12 މީހުން ޒަޚަމުވެފައިވާ ކަމަށްވެސް އެ ފަރާތްތަކުން މަޢުލޫމާތު ދީފައިވެއެވެ.

ރަޝިޔާގެ ޙަމަލާތަކުގައި އާންމުން ދިރިއުޅޭ 12 އެޕާޓްމަންޓެއްގެ އިތުރުން، ފަސް ގެއަކާއި، ފިހާރައަކާއި ގިނަ އަދަދެއްގެ އެއްގަމު އުޅަނދަށް ގެއްލުންވެފައިވާ ކަމަށް ސޫމީގެ ކަމާގުޅޭ އިދާރާތަކުން ބުނެފައިވެއެވެ. މި ސަރަޙައްދުތަކަށް ޙަމަލާ ދިނުމަށް ރަޝިޔާއިން ތިން އަސްކަރީ ޑްރޯން ބޭނުން ކޮށްފައިވާ ކަމަށްވެސް އެ ފަރާތްތަކުން ފާހަގަކޮށްފައިވެއެވެ.

ހުސްވި ހަފުތާއިން ފެށިގެން ރަޝިޔާއިން ދަނީ ސޫމީގެ އެކި ސަރަޙައްދުތަކަށް ޙަމަލާތައް އަމާޒު ކުރަމުންނެވެ. އޭގެ ތެރެއިން އެންމެ ގިނަ ޙަމަލާތައް ދީފައިވަނީ ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކާއި ވިއުގައަށެވެ. ހޫޝިވް ކިޔާ ރަށަކަށް އަމާޒުކޮށް ދީފައިވާ ޙަމަލާތަކެއްގައި ޢާންމުންގެ 12 މީހުން މަރުވެފައިވާ ކަމަށް އެ ރަށުގެ އޮފިޝަލުން ހާމަކޮށްފައިވެއެވެ.

ރަޝިޔާއިން ސޫމީއަށް ޙަމަލާތަކެއް ދީފައިވަނީ، ޔޫކްރެއިނުން ވެސް ރަޝިޔާގެ ރަށްތަކަށް އަމާޒުކޮށް ނުރައްކާތެރި ޙަމަލާތަކެއް ދޭން ފަށާފައިވާ ދަނޑިވަޅެއްގައެވެ. މި ޙަމަލާތަކުގައި ޔޫކްރެއިނުން ދަނީ އެމެރިކާއިން ފޯރުކޮށްދެމުންދާ ދުރު-ރާސްތާގެ މިސައިލްތައް ބޭނުން ކުރަމުންނެވެ.

ރަޝިޔާއާ ދެކޮޅަށް ޔޫކްރެއިނުން ކުރަމުންދާ ހަނގުރާމައިގައި ޔޫކްރެއިންގެ އެންމެ ބޮޑު މަދަދުގާރަކީ އެމެރިކާއެވެ. މިއީ، 'ޕްރޮކްސީ'އެއް ނުވަތަ މެދުވެރިއެއްގެ ގޮތުގައި ޔޫކްރެއިން ބޭނުން ކޮށްގެން، އެމެރިކާއާއި ހުޅަނގުގެ ދިފާޢީ އިއްތިޙާދު (ނޭޓޯ)ން ރަޝިޔާއާ ދެކޮޅަށް ކުރަމުންދާ ހަނގުރާމައެއްގެ ގޮތުގައި މަސްރަޙު ދިރާސާ ކުރާ ފަރާތްތަކުން ސިފަ ކުރާ ހަނގުރާމައެކެވެ.