އިސްރާއީލުގެ ހަމަލާތަކުން ގެދޮރު ގެއްލި ހާލުގައިޖެހިފައިވާ ޣައްޒާގެ އާންމުންނަށް އެހީތެރިކަން ފޯރުކޮށްދިނުމަށް ހޮނިހިރު ދުވަހު ވެއްދި 108 އެހީގެ ގާފިލާ ތެރެއިން 98 ގާފިލާ ލޫޓުވާލައިފިކަމަށް އދގެ ފަލަސްތީނު ރެފިއުޖީ އޭޖެންސީ (އުންރުވާ) އިން ބުނެފިއެވެ.
އުންރުވާގެ ސީނިއާ އިމަޖެންސީ އޮފިސަރު ލޫއީސް ވޯޓާރިޖް ވިދާޅުވީ، މިއީ 13 މަހަށް ވުރެ ގިނަ ދުވަސްވެފައިވާ ހަނގުރާމައިގައި މިހާތަނަށް ކުރިމަތިވި އެންމެ ބޮޑު ހާދިސާ ކަމަށެވެ. ނަމަވެސް، ލޫޓުވީ ކޮން ބައެއްކަން އުންރުވާއިން ހާމައެއްނުކުރެއެވެ.
"ކާބޯތަކެތި ނުލިބުމުގެ ސަބަބުން ދެ މިލިއަނަށްވުރެ ގިނަ މީހުންގެ ފުރާނައަށް އިތުރަށް ނުރައްކާވާނެ," ވޯޓާރިޖް ވިދާޅުވިއެވެ.
އިސްރާއީލުން ބުނީ ޣައްޒާއަށް އެކަށީގެންވާ ވަރަށް އެހީ ވެއްދުމަށް ކުރެވެން ހުރި ހުރިހާ މަސައްކަތެއް ކުރާ ކަމަށާއި، އިންސާނީ އެހީ ފޯރުކޮށްދިނުމަށް ހުރަސް ނާޅާ ކަމަށެވެ. ނަމަވެސް، އދގެ އެހީ ފޯރުކޮށްދޭ އޮފިޝަލަކު ވިދާޅުވީ، ޣައްޒާއަށް އެހީ ފޯރުކޮށްދިނުން މިހާރު ވަރަށް ބޮޑަށް ދަތިވެފައިވާ ކަމަށެވެ.
އިސްރާއީލުން މިދިޔަ އަހަރުގެ އޮކްޓޯބަރު މަހުގެ ހަތްވަނަ ދުވަހު ޣައްޒާއަށް ދޭން ފެށި ހަމަލާތަކުގައި މިހާތަނަށް 43،922 ފަލަސްތީނު މީހުން ވަނީ ޝަހީދުވެފައެވެ.
އިސްރާއީލުން ވަނީ އުންރުވާއިން އެ ގައުމުގައި ހަރަކާތްތެރިވުން މަނާކޮށް، އެ ޖަމިއްޔާއާ ގުޅުން ކަނޑާލާފައެވެ. އަދި، އެ ޖަމިއްޔާއާއި ހަމާސްއާ ގުޅުން އޮންނަ ކަމަށް ވެސް އިސްރާއީލުން ބުނެއެވެ. ނަމަވެސް، އުންރުވާއިން ވަނީ އެކަން ދޮގުކޮށްފައެވެ.
ކޮމެންޓް