ހިޒްބުﷲގެ މިސައިލް ހަމަލާއިން ޓެލްއަވީވަށް ބޮޑެތި ގެއްލުންތަކެއް ވެއްޖެ

ލުބްނާނުގެ ހިޒްބުﷲ ޖަމާއަތުން ދިން ރޮކެޓް ހަމަލާއެއް އިސްރާއީލުގެ ވެރިރަށް ޓެލްއަވީވަށް އެރުމުގެ ސަބަބުން ބޮޑެތި ގެއްލުންތަކެއް ލިބިއްޖެއެވެ.

މި ހަމަލާގައި ހަ މީހަކު ޒަޚަމްވެ، އޭގެ ތެރެއިން އެކަކުގެ ހާލަތު ވަނީ ފުރާނައަށް ނުރައްކާވާ ދަރަޖައިގައެވެ.

ހިޒްބުﷲއިން ބުނެފައިވަނީ ޓެލްއަވީވުގައިވާ ޓެރަރިސްޓް މަރުކަޒަކަށާއި އަސްކަރީ ހައްސާސް ޕޮއިންޓްތަކަކަށް ހަމަލާތަކެއް ދީފައިވާ ކަމަށެވެ. އިސްރާއީލުގެ މީޑިއާތަކުން ރިޕޯޓުކުރާ ގޮތުގައި މި ހަމަލާގެ ސަބަބުން ޓެލްއަވީވުގެ އެތައް އިމާރާތަކަށް މާއްދީ ބޮޑެތި ގެއްލުންތަކެއް ލިބިފައިވެއެވެ.

މި ހާދިސާގެ ވީޑިއޯތަކުން ދައްކާ ގޮތުގައި އެތައް އިމާރާތެއްގައި ވަނީ އަލިފާން ރޯވެފައެވެ. އިސްރާއީލުގެ ފަޔަރ އެންޑް ރެސްކިއު އޮތޯރިޓީން މައުލޫމާތު ދީފައިވާ ގޮތުގައި މި ހަމަލާތަކުގެ ސަބަބުން ތިން އިމާރާތަކަށާއި ތަކެއްޗަށް ވަނީ ބޮޑެތި ގެއްލުންތަކެއް ލިބިފައެވެ. އެ އިދާރާގެ މަސްއޫލުވެރިޔާ ބުނެފައިވަނީ މިވަރުގެ ބޮޑު ގެއްލުމެއް ޓެލްއަވީވުން ކުރިން ފެނިފައިނުވާ ކަމަށެވެ.

އިސްރާއީލު ސިފައިންގެ ބަޔާނެއްގައި ބުނެފައިވަނީ ޓެލްއަވީވުގެ އިމާރާތްތަކަށް ވެއްޓިފައިވަނީ ހިޒްބުﷲގެ މިސައިލްތަކަށް ހުރަސްއަޅަން އިސްރާއީލުގެ ވައިގެ ދިފާއީ ނިޒާމުތަކުން ފޮނުވި ރޮކެޓްތަކުގެ ބައިތަކެއް ކަމަށެވެ. ނަމަވެސް އިސްރާއީލުގެ ފުލުހުންގެ ބަޔާނެއްގައި ބުނެފައިވަނީ ޓެލްއަވީވުގެ އިމާރާތްތަކަށް އަރާފައިވަނީ ސީދާ ހިޒްބުﷲއިން ފޮނުވި މިސައިލްތަކެއް ކަމަށެވެ.

މި ހަމަލާއާ ގުޅިގެން އިސްރާއީލުގެ މައި އެއަރޕޯޓްކަމަށްވާ ބެން ގޫރިއަން އެއަރޕޯޓް ވަގުތީގޮތުން ބަންދުކުރެވުނެވެ. ނަމަވެސް ފަހުން ވަނީ އަލުން ހުޅުވާލާފައެވެ. މި ހަމަލާއަކީ އިސްރާއީލަށް ރައްދު ދިނުމުގެ ގޮތުން ހިޒްބުﷲއިން ފަހަކަށް އައިސް ދެމުންދާ މިސައިލް ހަމަލާތަކުގެ ތެރެއިން އެއް ހަމަލާއެވެ.