ގައުމަށް ގަދަރުކުރާ ޖީލެއް ބިނާކުރުމުގެ މަގުތައް ހުޅުވިގެންދާތީ އުފާކުރަން: މެޑަމް ސާޖިދާ

މި ސަރުކާރަށް ވީ އެއް އަހަރުގެ ތެރޭގައި ގައުމަށް ގަދަރުކުރަން އެނގޭ ޖީލެއް ބިނާކުރުމުގެ މަގުތައް  ހުޅުވިގެންދާތީ އެކަމާ އުފާފުޅުވާ ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެ އެވެ.

އެކަމަނާ މިފަދައިން ވިދާޅުވީ ދިވެހި ގައުމިއްޔަތުގެ އިސްވަރުގެ އޮފީސް ހުޅުވައިދެއްވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.

ސާޖިދާ ވިދާޅުވީ ދިވެހި ގައުމިއްޔަތުގެ އިލްމަކީ ދިވެހިން ދެމިތިބުމާ ގުޅިފައިވާ އިލްމެއް ކަމަށެވެ. އަދި ކޮންމެ ގައުމެއްގައި ވެސް އޮންނާނީ އެ ގައުމެއްގެ އަމިއްލަ ގައުމިއްޔަތެއްކަން ފާހަގަކުރައްވައި، ރާއްޖޭގައި އޮންނަން ވާނީ ދިވެހިންގެ އަމިއްލަ، ދިވެހި ގައުމިއްޔަތެއް ކަމަށް ވިދާޅުވި އެވެ.

"އިލްމީ ގޮތުން ދިވެހި ގައުމާ އެއްކޮޅަށް ވިސްނަން އެނގޭ ކަހަލަ، އަމިއްލަ ނަފުސާއި އަމިއްލަ ގައުމަށް ގަދަރު ކުރަން އެނގޭ ޖީލެއް ބިނާވުމުގެ މަގުތައް ހުޅުވޭތީ، މަންމައެއްގެ ހައިސިއްޔަތުން އެންމެ އުފާވާ ކަމެއް" ސާޖިދާ ވިދާޅުވި އެވެ.

ސާޖިދާގެ ވާހަކަފުޅުގައި މި ސަރުކާރަށް ވީ އެއް އަހަރުގެ ތެރޭގައި އެ އަމާޒަށް ވާސިލުވާން ކުރި މަސައްކަތްތަކަށް ވެސް އަލިއަޅުވާލެއްވި އެވެ. އޭގެ ތެރޭގައި ދިވެހި ގައުމިއްޔަތުގެ އިސްވަރު އުފެއްދުމާއި، ދިވެހި ތަރިކަ ދިރާސާކުރާ ގައުމީ މަރުކަޒު ގާއިމުކުރުން ހިމެނެ އެވެ.

ގައުމިއްޔަތުގެ އިސްވަރު އޮފީސް ހުޅުވުމުން މަސައްކަތްތައް އިތުރުވުމާ އެކު މަސައްކަތްތައް ހަލުވިވެގެންދާނެ ކަމަށް ސާޖިދާ ވިދާޅުވި އެވެ. ގައުމިއްޔަތުގެ އިސްވަރަކީ ގައުމިއްޔަތުގެ ދިރާސާތައް ހެދުމަށް ސަރުކާރުން އުފައްދަން ނިންމާފައިވާ ކޮލެޖެއް ކަމާއި، މިދިޔަ ސެޕްޓެމްބަރުގައި ރައީސް ވަނީ އެ ކޮލެޖު އިފްތިތާހު ކޮށްދެއްވާފައިވާ ކަން ފާހަގަކޮށްލެވެ އެވެ.