ހުޅުމާލޭ ކެފޭއަކަށް ވަދެ މާރާމާރީ ހިންގި މީހާ ޝަރުތުކުރުމަށްފަހު ދޫކޮށްލައިފި

ހުޅުމާލޭ ކެފޭއަކަށް ރޭ ބަޔަކު ވަދެ މާރާމާރީ ހިންގި މައްސަލައިގައި ހައްޔަރު ކުރި މީހާ ޝަރުތުކުރުމަށްފަހު ދޫކޮށްލައިފިއެވެ.

ފުލުހުން ބުނީ ހުޅުމާލެ ރާކަނި ބީޗު ކެފޭގައި ދެމީހެއްގެ ދެމެދުގައި ހިނގި މާރާމާރީއަކާ ގުޅިގެން ހައްޔަރު ކުރީ އުމުރުން 41 އަހަރުގެ ދިވެހި ފިރިހެނެއް ކަމަށެވެ.

އޭނާގެ ބަންދާމެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން ޝަރުތުކުރުމަށްފަހު ދޫކޮށްލާފައިވާ ކަމަށްވެސް ފުލުހުން ބުނެއެވެ.

އެހެންނަމަވެސް ކޯޓުން އޭނާއަށް ކުރީ ކޮން ޝަރުތެއް ކަމެއް ފުލުހުން ބުނެފައެއް ނުވެއެވެ.

އެ މާރާމާރީ ހިންގައި މަންޒަރު ފެންނަ ވީޑިއޯއެއް މީސް މީޑިއާގައި އާންމުވެފައިވާއިރު، ވީޑިއޯއިން ފެންނަ ގޮތުން ދެ މީހަކު ކެފޭ ތެރޭގައި އިށީންދެލައިގެން ތިއްބައި ސައިކަލެއްގައި އައިސް ކެފޭ ކުރިމައްޗަށް ދެ މީހަކު މަޑުކޮށްލައެވެ.

އެއަށްފަހު، އެ މީހުން ތެރެއިން އެކަކު ގޮސް ކެފޭ ތެރޭގައި އިށީންދެގެން އިން މީހަކަށް ގޮނޑިއަކުން ހަމަލާދެނިކޮށް ފެނެއެވެ. އަދި އެއަށް ފަހު، ދެ މީހުންގެ ދެމެދުގައިވެސް މާރާމާރީ ހިނގާ މަންޒަރު ފެނެއެވެ.

ވީޑިއޯއިން ފެންނަގޮތުގައި އެ މާރާމާރީ ހުއްޓުވީ ކެފޭ ތެރޭގައި އެވަގުތު ތިބި ބަޔަކު ގޮހެވެ.