އައިޑީކާޑާއި ޕާސްޕޯޓުގެ ހިދުމަތް މުޅި ރާއްޖެއަށް ފުޅާކުރުމުގެ މަޝްރޫއު ފައްޓަވައިދެއްވައިފި

އައިޑީކާޑާއި ޕާސްޕޯޓުގެ ހިދުމަތް މުޅި ރާއްޖެއަށް ފުޅާކުރުމުގެ މަޝްރޫޢު ރައީސުލްޖުމުހޫރިއްޔާ ޑރ. މުހައްމަދު މުއިއްޒު ފައްޓަވައިދެއްވައިފިއެވެ.

މި މަޝްރޫއު ފެށުމުގެ ގޮތުން ރައީސް އޮފީހުގައި މިއަދު ބޭއްވި ޚާއްޞަ ރަސްމިއްޔާތެއްގައި ވަނީ ހަ ރަށެއްގައި މި ހިދުމަތް ފަށައިފިއެވެ.

މި މަޝްރޫޢުގެ ދަށުން ގްރޭޓަރ މާލެ ސަރަހައްދާއި އަތޮޅުތައް ހިމެނޭ ގޮތަށް ހަ ތަނެއްގައި އައިޑީކާޑު ޕްރިންޓުކުރުމާއި ޕާސްޕޯޓް ދޫކުރުމުގެ ހިދުމަތް ވަނީ ގާއިމުކޮށްފައެވެ. މީގެ ތެރޭގައި ހިމެނެނީ ފަސް ތަނެއްގައި ޕާސްޕޯޓު ދޫކުރުމުގެ ހިދުމަތާއި ތިން ތަނެއްގައި އައިޑީކާޑު ދޫކުރުމުގެ ހިދުމަތެވެ.

ޕާސްޕޯޓް ދޫކުރުމުގެ ހިދުމަތް ފަށާފައިވަނީ ހުޅުމާލެ ފުރަތަމަ ފިޔަވަހި، ހުޅުމާލެ ދެވަނަ ފިޔަވަހި، ވިލިމާލެ، ދ. ކުޑަހުވަދޫ އަދި ލ. ފޮނަދޫގައެވެ. އައިޑީކާޑުގެ ހިދުމަތް ފަށާފައިވަނީ ހުޅުމާލެ ފުރަތަމަ ފިޔަވަހި، ހުޅުމާލެ ދެވަނަ ފިޔަވަހި އަދި ކުޅުދުއްފުށި ސިޓީގައެވެ.

މި ރަސްމިއްޔާތުގައި އަންނަ އަހަރުގެ ތެރޭގައި މުޅި ރާއްޖެއަށް މި ހިދުމަތް ފުޅާކުރާނެ ގޮތުގެ މަގު ޗާޓެއް ވެސް ވަނީ ހާމަކޮށްފައެވެ. އެ ގޮތުން އަންނަ އަހަރުގެ ތެރޭގައި އަތޮޅުތަކާއި ބައެއް ރަށްތައް ހިމެނޭ ގޮތަށް 21 ތަނެއްގައި މި ހިދުމަތް ފެށުމަށް ވަނީ ނިންމާފައެވެ.

ހޯމް މިނިސްޓަރު އަލީ އިހުސާން ވިދާޅުވީ މުޅި ރާއްޖެއަށް މި ހިދުމަތް ފުޅާކުރުމަކީ ރައީސް މުއިއްޒުގެ ރިޔާސީ ވައުދެއް ކަމަށާއި، އަންނަ އަހަރުގެ ނިޔަލަށް މި މަޝްރޫޢު ނިންމުމަށް ރައީސް ވަކި ތާރީޚުތަކެއް ދެއްވާފައިވާ ކަމަށެވެ.

އިހުސާން އިތުރަށް ވިދާޅުވީ އައިޑީކާޑުގައި ހިމެނޭ މުހިންމު މަޢުލޫމާތުތަކުގެ ސަލާމަތާއި ރައްކާތެރިކަން ކަށަވަރުކުރެވިފައިވާ ކަމަށެވެ. އެ ގޮތުން އަލަށް ހިދުމަތް ފަށާ ސަރަހައްދުތަކުން ހުށަހަޅާ އެޕްލިކޭޝަންތައް އޮތަރައިޒްކުރެވޭނީ ހަމައެކަނި ޕްރިންޓުކުރުމަށް އެކަނި ކަމަށް އޭނާ ވިދާޅުވިއެވެ.