ޓްރަމްޕާއި ބައިޑެން ބައްދަލުކޮށް އިންތިގާލީ މަރުހަލާ އޮމާންކޮށް ކުރިއަށް ގެންދިއުމަށް އެއްބަސްވެއްޖެ

އެމެރިކާގެ އަލަށް އިންތިޚާބުވި ރައީސް ޑޮނަލްޑް ޓްރަމްޕް އަދި މިހާރުގެ ރައީސް ޖޯ ބައިޑެން ބުދަ ދުވަހު އޯވަލް އޮފީހުގައި ބައްދަލުކުރައްވައި، އިންތިގާލީ މަރުހަލާ "އޮމާންކަމާއެކު" ކުރިޔަށް ގެންދިއުމަށް އެއްބަސްވެވަޑައިގެންފިއެވެ.

މި ބައްދަލުވުމަކީ ވެރިކަން އޮމާންކަމާއެކު ބަދަލުކުރުމުގެ އާންމު އުސޫލެއްގެ ގޮތުން ކުރެވޭ ބައްދަލުވުމެކެވެ.

ބައްދަލުވުމުގައި ބައިޑެން ވަނީ ޓްރަމްޕަށް ވައިޓް ހައުސްގައި މަރުހަބާ ދަންނަވައި، އޮމާންކަމާއެކު އިންތިގާލީ މަރުހަލާ ކުރިޔަށް ގެންދެވޭނެކަމުގެ އުންމީދު ފާޅުކުރައްވާފައެވެ. ޓްރަމްޕްވެސް ވަނީ ޝުކުރު އަދާކުރައްވައި، މިއަދަކީ ރީތި ދުވަހެއްކަމަށް ވިދާޅުވެފައެވެ.

ރައީސްކަމަށް އިންތިޚާބުވި ޓްރަމްޕް ބުދަ ދުވަހު ވޮޝިންގްޓަނަށް ޒިޔާރަތްކުރެއްވީ، ބިލިއަނަރު އީލޮން މަސްކްއާ އެކުގައެވެ. އޭނާ ވަނީ ރިޕަބްލިކަން މެންބަރުންނާ ބައްދަލުކުރެއްވުމަށްފަހު، ރައީސް ޖޯ ބައިޑެންއާ އޯވަލް އޮފީހުގައި ބައްދަލުކުރައްވާފައެވެ.

2021 ވަނަ އަހަރުގެ ޖަނަވަރީ 6 ގައި ހިނގި ކެޕިޓަލް ހަމަލާއަށްފަހު، ސިޔާސީގޮތުން ބަލިވެ، ނުފޫޒު ގެއްލިފައިވާ ލީޑަރެއްގެ ގޮތުގައި ވޮޝިންގްޓަން ދޫކުރެއްވި ޓްރަމްޕް، މިހާރު ދަނީ އަލުން ވެރިކަމާ ހަވާލުވުމަށް ތައްޔާރުވަމުންނެވެ. ނަމަވެސް 2020 ގެ އިންތިޚާބުގައި ބައިޑެންއާ ވާދަކޮށް ބަލިވުމުން، ޓްރަމްޕް ވަނީ ވޯޓު އޮޅުވާލުމުގެ ތުހުމަތުތައް ކުރައްވާފައެވެ.

އިންތިޚާބީ ކެމްޕޭންގައި ޓްރަމްޕަކީ ޑިމޮކްރަސީއަށާއި ގައުމުގެ އަސާސީ އަގުތަކަށް ނުރައްކަލެއްކަމަށް ވިދާޅުވި ނަމަވެސް، ބައިޑެން މިހާރު ވިދާޅުވަނީ އިންތިގާލީ މަރުހަލާ އޮމާންކަމާއެކު ކުރިޔަށް ގެންދިއުމަށް އެހީތެރިވެދެއްވާނެ ކަމަށެވެ. ވައިޓް ހައުސްގެ ޕްރެސް ސެކްރެޓަރީ ކެރީން ޖީން-ޕިއޭ ވިދާޅުވީ، މިއީ އެމެރިކާ ރައްޔިތުންނަށްޓަކައި ކުރަންޖެހޭ ރަނގަޅުކަމެއް ކަމަށެވެ.