ރައީސް މުއިއްޒު ކޮޕް 29 ގައި ބައިވެރިވެވަޑައިގަތުމަށް ބާކޫއަށް ވަޑައިގެންފި

ރައީސުލްޖުމުހޫރިއްޔާ ޑރ. މުޙައްމަދު މުއިއްޒު

ރައީސުލްޖުމުހޫރިއްޔާ ޑރ. މުޙައްމަދު މުއިއްޒު އދ.ގެ ފެރޭމްވޯކް ކޮންވެންޝަން އޮން ކްލައިމެޓް ޗޭންޖްގެ ދަށުން ބާއްވާ ކޮޕް 29ވަނަ ކޮންފަރެންސްގައި ބައިވެރިވެވަޑައިގަތުމަށް އަޒަރްބައިޖާންގެ ބާކޫއަށް ވަޑައިގެންފިއެވެ.

މި މަހުގެ 22 ވަނަ ދުވަހާ ހަމައަށް ކުރިއަށްދާ މި ކޮންފަރެންސްގައި ރައީސް މުއިއްޒު ބައިވެރިވެވަޑައިގަންނަވަނީ ސަރުކާރުގެ މަތީ ފަންތީގެ ވަފުދަކާ އެކުގައެވެ.

ކޮޕް 29ގެ އެޖެންޑާގައި ހިމެނެނީ އެން ހޭންސްޑް ޓްރާންސްޕޭރެންސީ ނެޓްވޯކް ފުރިހަމަ ކުރުމާއި، މާލީ އައު ލަނޑުދަނޑިއެއް ކަނޑައެޅުމާއި، ބައިނަލްއަޤްވާމީ އެއްބާރުލުން އިތުރުކުރުމުގެ އިތުރުން ނޭޝަނަލީ ޑިޓަރމައިންޑް ކޮންޓްރިބިއުޝަންސް (އެންޑީސީ) ތަރައްޤީކުރުމުގައި ހުރި ގޮންޖެހުންތަކާ ބެހޭ މަޝްވަރާތަކެވެ.

ރައީސް މުއިއްޒު މި ދަތުރުފުޅު ކުރައްވަނީ ސައުދީ ޢަރަބިއްޔާގެ ރިޔާދުގައި ބޭއްވުނު ޖޮއިންޓް ޢަރަބް-އިސްލާމިކް އެކްސްޓްރާއޯޑިނަރީ ސަމިޓުގައި ބައިވެރިވެވަޑައިގަތުމަށްފަހުގައެވެ. އެ ސަމިޓުގައި އެމަނިކުފާނު ވަނީ ފަލަސްޠީނާއި ލުބްނާނަށް އިޒްރޭލުން ދެމުންދާ ހަމަލާތަކާ ގުޅޭ މަޝްވަރާތަކުގައި ބައިވެރިވެވަޑައިގެންފައެވެ.

ރައީސް މުއިއްޒު ބާކޫއަށް ވަޑައިގަތުމުން، އަޒަރްބައިޖާން ސަރުކާރުގެ އިސް އޮފިޝަލުން ވަނީ ހައިދަރް އަލިޔޭވް ބައިނަލްއަޤުވާމީ ވައިގެ ބަނދަރުގައި ހޫނު މަރުޙަބާއެއް ދަންނަވާފައެވެ. މި ދަތުރުފުޅުގައި ރައީސް މުއިއްޒު ބައިވެރިވެވަޑައިގަންނަވާ ކޮޕް 29 ކޮންފަރެންސްގައި މޫސުމީ ބަދަލުތަކާ ގުޅޭ މުހިންމު މަޝްވަރާތަކެއް ކުރިއަށްދާނެ ކަމަށް ބެލެވެއެވެ.

ރައީސް ޑރ މުޙައްމަދު މުޢިއްޒު