ޔުނައިޓެޑްގެ ދާއިމީ ކޯޗުކަން ކުރަން ބޭނުންވާކަމަށް ވަގުތީ ކޯޗު ނިސްޓެރޫއީ ބުނެފި

ކޮންމެވެސް ދުވަހަކުން އެ ކްލަބްގެ ދާއިމީ ކޯޗުގެ މަގާމު އަދާކުރަން ބޭނުންވާކަމަށް މެންޗެސްޓާ ޔުނައިޓެޑްގެ ވަގުތީ ކޯޗު ރޫޑް ވެން ނިސްޓެރޫއީ ބުނެފިއެވެ.

ނިސްޓެރޫއީ މި މަގާމާ ހަވާލުވީ ކުރީގެ ކޯޗު އެރިކް ޓެން ހަގް މަގާމުން ވަކިކުރުމާ ގުޅިގެންނެވެ.

ނިސްޓެރޫއީ ބުނެފައިވަނީ ޔުނައިޓެޑްގެ އެސިސްޓެންޓް ކޯޗުގެ މަގާމަށް އައި އިރުވެސް އޭނާގެ މަގުސަދަކީ ކޮންމެވެސް ދުވަހަކުން ޓީމުގެ ހެޑް ކޯޗުކަން ކުރުން ކަމަށެވެ. އަދި ޔުނައިޓެޑް ފިޔަވައި އެހެން ޓީމެއްގައި އެސިސްޓެންޓް ކޯޗުކަން ކުރަން އޭނާ ބޭނުން ނުވާ ކަމަށްވެސް ބުނެފައިވެއެވެ.

ނަމަވެސް، ޔުނައިޓެޑްގެ އައު ކޯޗުގެ ގޮތުގައި ސްޕޯޓިން ލިޒްބަންގެ ކޯޗު ރުބެން އަމޯރިމް ހޮވިފައިވާއިރު، އޭނާ އަންނަނީ އަމިއްލަ ކޯޗިން ސްޓާފާ އެކުގައެވެ. މިކަމާ ގުޅިގެން ނިސްޓެރޫއީގެ މަގާމާ މެދު ކަންބޮޑުވުންތަކެއް އުފެދިފައިވެއެވެ.

ވަގުތީ ކޯޗުގެ ގޮތުގައި ނިސްޓެރޫއީ އާއެކު ޔުނައިޓެޑުން ވަނީ ތިން މެޗު ކުޅެ، ދެ މެޗު ކާމިޔާބުކޮށް، އެއް މެޗުން އެއްވަރުވެފައެވެ. މާދަމާ ރޭ ލެސްޓަ ސިޓީއާ ދެކޮޅަށް ކުޅޭ މެޗަކީ ވަގުތީ ކޯޗުގެ ގޮތުގައި ނިސްޓެރޫއީ ޓީމަށް އިރުޝާދުދޭނެ އެންމެ ފަހު މެޗު ކަމަށް ވާނެއެވެ.